Manipur : Jornalist khan laga arrest huwa te Congress para BJP sarkar ke target kurisey

Imphal, January 07 : Manipur te duijun journalist arrest huwa laga mamla te Congress para BJP sarkar ke target kurisey.

Congress party laga chairman, media & publicity, Pawan Khera para duita local bhasa laga newspaper journalist arrest huwa mamla te BJP sarkar ke target kurisey.

Congress para journalist Wangkhemcha Shyamjai aro Dhanbir Maibam ke “gusa uthaidiiya laga news” aro “nafrat baraidiya” laga iljam lagaikina arrest kora laga mamla uthaisey.

Pawan Khera para koisey, “ Manipur laga BJP sarkar tu journalist khan ke arrest kurikina Freedom of Press(press laga azadi) ke hamla kuri asey. Etu journalist khan laga opor te dangor iljam lagaikina aro Editors Guild of India (EGI) para etu rajya laga asli naksa laga report imandari para dibole kosis kora homoitey taikhan logotey bi behes kurisey. Aro etu sob tu rajya ke larayi jhagra, garbari aro olta polta halat te dubaikina rajya laga halat ke galat tarika para handle kora laga iljam para bachibole nimitey kora laga asey.”

Congress para agey barikina duijun journalist ke arrest kora tu condemn kurisey aro koisey ki taikhan ke dhomki aro bhoi nakhelaikina taikhan laga kaam tu kuribole dibo lagey.

Congress para agey barikina koisey ki BJP sarkar tu press laga azadi ke chini aseykilemaney journalist khan para Manipur te hoithaka larayi jhagra laga asli picture dikhabole kosis kuri asey.

Kangleipakki Meira koikina ekta local bhasa newspaper laga news editor, Wangkhemcha Shyamjai tu juwa saal December 29 te newspaper te ekta article publish kora nimitey  arrest hoisiley. Etu article tu tai para December 2 te publish kurisiley. Aro All Manipur Working Journalists’ Union aro Editors’ Guild Manipur para milikina authorities ke taikey release kuribole request kora picheyte December 31 te taikey bail disey.

Dusra fale, Hueiyen Lanpao laga Editor Dhanabir Maibam ke Manipur police para January 5 te arrest kurisiley Taikey arrest kora tu dhorom aro race ke loikina dushmani promote laga iljam te thakisey. Manipur laga BJP vice president Laishram Meenabanta Singh para tailaga against te nafrat baraidiya laga iljam lagaikina complaint file kurisiley.

Congress para arrest hoikina thaka journalist khan ke joldi charidibole demand kurisey.