Imphal, January 4 : Larayi jhagra para affect hoikina thaka rajya Manipur te boha Kuki-Zo group khan para rajya laga plain area khan te Armed Forces Special Powers Act (AFSPA) aro wapas lagu kuribole demand kurisey.
Etu opor te, Manipur laga Kuki-Zo group khan para rajya laga pahari area khan para rajya laga police ke hataidibole bi demand kurisey
Committee on Tribal Unity (CoTU0 aro Indigeneous Tribal Leaders’ Forum (ITLF) para union home minister Amit Shah ke India-Myanmar border town Moreh aro etu laga next te thaka tribal manu khan boha jaga para rajya laga police khan ke hataidibole aro Manipur laga plain area khan te AFSPA lagu kuribole request kurisey.
Manipur laga Kuki tribe khan ke represent kora CoTU aro ITLF para rajya laga police khan para taikhan ke dukh diktar diya laga against te protest kuribole nimitey 24 ghonta laga bandh rakhisiley.
Olop din ageyte larayi jhagra huwa laga ghotna ola picheyte Manipur te nutun jhamila olaithaka dikhi asey.
Manipur laga Chief Minister N Biren Singh pra rajya te chuli thaka situation opor te bisi chinta jataisey. Aro kun manu khan jhamila baraidiya te shamil asey taikhan laga against te sarkar para kara action lobo koikina warning disey kuntu te AFSPA ke wapas lagu kora laga warning bi thakisiley.
Add Comment