Imphal, January 09 : Manipur laga Tengnoupal district te thaka Moreh town te jhamila barija aro ajikali gondogol hoi thaka homoitey, Lt(Leutenanat) General HS Sahi para Tengnoupal District laga busti volunteer khan logotey ekta jaruri meeting rakhisey. Etu meeting tu Moreh laga Inspection Bungalow te hoisey. Moreh tu enaka town asey kuntu te suspect thaka atangwadi khan para security forces khan ke bisi hamla kuri thaka laga ekta main centre asey.
Moreh laga situation tu jhamila para bhorta asey kotey security personnel(police, army khan)ke achanak para hamla hoi thakey. December 30, 2023 te IED aro alag phuta bustu khan para achanak hamla huwa te Manipur security laga ekjun jawan jokhom khaisey. Etu ghotna tu din laga 3:30 pm fale hoisiley jitya etu atangwadi khan para Moreh laga Key Location Point (KLP) osor te police commando khan ke bukha gari ke target kurisey. Etu jokhom kha jawan khan tu 5 Assam Rifles camp te medical treatment paisey.
Etu ekla nohoikina January te ekta search operation kurithaka homoitey, 7jun security personnel jokhom khaisey. Agey barikina etu ghotna huwa laga ekey din te atangwadi khan para Manipur police commando laga barrack bhitor te rocket laga modod para grenade felaikina taikhan ke hamla kurisey.
Etu mamla khan ola majotey, Manipur laga Chief Minister Biren Singh para etu hamla khan kora te Myanmar laga foreign sipahi khan shamil asey koikina koisey.
Lt General HS Sahi para busti laga volunteer leader khan logotey meeting kora laga maksat tu etu jhamila khan ke address kuribole aro Moreh te bodli hoithaka situation ke thik kuribole laga tarika bisaribole nimitey asey.
Add Comment