Imphal, January 08 : Manipur te thaka India-Myanmar laga border town, Moreh para bhari guli mara huwa laga report olaisey.
Etu guli mara mari tu Monday (January 08) te Moreh te security forces aro hathyar bukhikina thaka atangwadi khan laga majotey hoisey.
Guli mara mari huwa ghotna laga report tu Manipur laga Moreh town laga ward number 8 para olaisey.
Etu ageyte, Sunday (January 07) laga rati te Moreh te hathyar bukhikina thaka badmash khan para Manipur police commando laga complex aro alag security post khan te hamla kurisey.
Etu hamla tu rati 7pm para suru hoisey aro guli mara mari huwa tu 10pm tak chulisey.
Atangwadi khan tu duita dozen(24) maan thakisey. Taikhan para Commando Complex, Moreh Bazaar, Ward Number 7,9 aro Moreh Complex Court ke target kurikina hamla kuribole nimitey bomb aro bunduk khan cholaisey.
Security forces jaiseki Assam Rifles, BSF aro state police commando khan para logalog jawabi hamla kurisey aro situation ke control kuriloisey.
Etu report file kora homoitey security forces khan majotey jokhom kha nohoilebi mora mori huwa laga eku mamla olanai. Hoilebi police para suspect kuri asey ki guli mara mari huwa homoitey kunba atangwadi khan jokhom hoisey.
Etu hamla tu December 30, 2023 laga rati te huwa hamla picheyte hoisey kuntu te 11 security personnel jokhom hoisey. Etu jokhom huwa security personnel majotey BSF trooper shamil thakisey.
Gondogol barija nimitey authorities khan para Moreh te December 30, 2023 para night curfew lagu kuribole majbur hoisey.
Hoilebi etu hamla khan kora laga maksat tu etya bi safa para najanikina asey.
Add Comment