Imphal, November 10 : Manipur laga Churachandpur aro Bishnupur district te thaka Tangjeng aro Pombikhok busti khan te gondogol olaisey. Hathyar bukhikina thaka group khan laga majotey bisi dangor guli mara mari hoisey kuntu te Friday din te ekjun busti laga volunteer jokhom khaisey.
Etu mamla ke samhalibole nimitey, security forces aro rajya laga police laga ekta joint team tatey jag ate pungchisey.
Etu nutun ghotna tu titya olaisey jitya kunba nachina gunmen para Friday din laga 6 am fale Manipur laga Bishnupur district te thaka Kumbi police station laga under te thaka Pompikhong aro Chandrapokpi busti khan fale khula khuli guli marisey.
Non tribal community laga ekjun busti volunteer para tailaga left fale laga shoulder te guli lagisey jitya etu tribal hathyar bukhikina thaka manu para guli marikina hamla kurisey.
Etu duita group laga majotey guli mara mari huwa laga awas ola picheyte, central security forces, Indo Tbetian Border Police (ITBP), aro Manipur Police Commando khan etu jag ate pungchikina cover fire kurisey.
Etu picheyte, etu duita group laga majotey guli mara mari huwa tu rukhi jaisey.
Manipur laga rajya te thaka khatarnak border tu etu jati khan laga majotey larayi jhagra huwa picheyte 7 moina nimitey jhamila te thakisey aro etu te 180 para bisi manu laga jaan jaisey aro 61,000 manu tu nijor laga jaga para dur hoijaisey.
Add Comment