Manipur Police para duata betor manu dure she, bunduk marea laga mamla opor te

Imphal, January 11, 2026: Manipur Police khan para duata senior cadres, kun KCP (Noyon) laga member ase, tai jun ke dure she, Imphal West laga tinta jaga te bunduk para hamla kurea laga mamla opor te, January 9 te. Etu arrest toh investigators khan Langjing Achouba, Ghari aro Sangaiprou te CCTV laga footage khan sa piche, tai khan laga jankare pa piche te kure she. Durea khan laga nam toh Khaidem Ranjit ase, tai toh 65 sal ase, aro tai toh Sagolband Moirang Hanuba te buhea koi she, tai laga ghor para he tai ke dure she koishe. Aro alak laga nam toh Sanasam Biramangol ase, tai toh 63 sal ase, aro tai toh Phumlou te para dure she. Dua jun ke be January 10 te dure she Police khan para. Police khan M-20 pistol aro gule pai she, hamla te chola laga, aro tinta scooty aro ekta mobile phone pai she koishe. Etu duata manu toh eight bunduk laga hamla kurea laga mamla logo te link ase koishe, Dr Loken laga ghor te hamla te be tai jun connection ase koishe. Aro alak operation te, January 10 te security forces khan Kangpokpi district laga Awlmun bosti te bunduk khan pai she koishe. Tai khan AK-47 rifle, sex alak bunduk, charta mortars, duata grenade aro 38 guli, larai kurea laga kapor, aro hath te durea laga radio set khan pai she etu operation te.