Imphal, November 1 : Manipur laga sarkar para Manipur police officer, Chingtham Anandkumar Singh ke somman disey kun October 31 te Kuki atangwadi khan laga haath te girisey.
November 1 te 1st MR Parade Ground te thaka Manipur Police Memorial te Chingtham Anandkumar Singh ke somman diya laga ceremony rakhisey.
Etu ceremony ke Chief Minister N Biren Singh para tailaga cabinet minister aro kunba MLA khan logotey attend kurisey, kuntu te security advisor Kuldiep Singh bi shamil thakisey. Bisi police officer khan para etu somman diya ceremony ke attend kurisey aro Chingtham Anandkumar laga mrija atma ke akhri salute disey.
Somman diya laga ceremony khotom huwa picheyte, Chingtham Anandkumar laga dead body tu tailaga ghor te antim sanskar kuribole nimitey loijaisey kuntu toh Imphal West laga under te thaka Kwakeithel Haobam Marak te asey.
Moreh laga SDPO Chingtham Anand ke Kuki atangwadi khan para guli marikina moraidisiley.
Kuki atangwadi(suspect thaka) khan para phujur 9 :30 am fale Tengnoupal district laga under te thaka Moreh Ward No.7 Eastern Shine School Ground te Moreh police ke achanak para hamla kuridisey.
Etu ghotna tu titya hoisey jitya Police team khan para helicopter land kuribole thaka nimitey ground safa kora laga kaam sai thakisey.
SDPO Chingtham Anand murija picheyte, Moreh town te etu hathyar bukhikina thaka badmash khan laga against te operation suru kuribole nimitey extra forces(sipahi) khan ke pathaisiley.
Add Comment