Imphal, January 29 : 8 moina para bisi chola larayi jhagra te ekta solution anikina shanti aro normal situation wapas anibole laga kosis te, Communist Party of India, Manipur State Council para 3-din laga hunger strike(bhuk hartal) rakha tu Monday din te second din hoisey.
Protest kora jaga te banner aro placard dhal ate enaka likhikina thakisey, “ Lok Sabha election hobole ageyte etya chuli thaka jhamila te ekta political solution anibi,” “Larayi jhagra joldi rokhaidibi,” “Etya Assembly session rakhibi,” “Joldi ghor para dur hoija manu khan ke taikhan nijor nijor laga ghor te wapas settle kuridibi,” “Kuki militant group khan logotey SoO agreement kora tu hataidibi nohoilebi review kuribi,” “Manipur ke bhanga tu nuchulibo”, “Manipur te alag administration nalagey.”
Etu bhuk hartal tu Imphal East district laga under te thaka Lamlai police station under te Chalou koikina ekta jaga te thaka Irawat Park te Sunday(January 29) te suru hoisey.
Second din te, etu bhuk hartal tu Imphal laga Irabot Bhavan te kurisiley.
CPI Manipur State Council laga Assistant Secretary, M Joykumar para koisey ki Tuesday(January 30) tu etu bhuk hartal kora laga akhri din asey aro etu tu Thoubal district laga Communist Party of India(CPI) aro Kakching Local Council laga support para kuribole asey.
CPI leader para etu bi demand kurisey ki rajya te NRC lagu kuribo lagey taki dusra jaga para ahikina illegal tarika para rajya te boha manu khan ke dhurikina wapas pathaidibo paribo. Judi sarkar para demand pura koranai koiley, CPI tu manu khan logotey milikina aro jor para protest kuribole tayar asey koisey.
Add Comment