Manipur te 643 notun Covid case aro 8 jun mora khobor

July 5, 2021. Manipur te COVID-19 bemari halat toh besi beya jai ase, Sunday din Manipur te COVID-19 bemar para 8 jun manuh mora khobor paishe. Etu bemar para 8 jun mora te itya Manipur te COVID-19 para manuh mora toh 1196 te othishe, etu samai States te aro notun COVID-19 positive cases toh 643 registered hoishe. 643 notun cases pithor te, 637 toh general public logot thurishe aro 6 cases toh central paramilitary State te bohi thaka khan oper te thurishe. Imphal West te sobse besi cases toh 242 thurishe, etu beche Imphal East te (145) cases, Thoubal te (76) caes, Churachandpur  te (65), Bishnupur te (58),  Kangpokpi te  (13),  Kakching te (10),  Chandel te  (15),  Ukhrul  te (5),  Senapati te (2),  Tamenglong te  (2), Tengnoupal te (2) aro Jiribam te (2) cases ase koishe.  Etu notun 643 cases thura te, Manipur te active cases toh 6159 te othishe. Etu samai 24 gonda pithor te 602 manuh bemar bhal hoishe koikena khobor paishe. Manipur te itya COVID-19 bemar bhal howa rate toh 89.82 per cent te ase koishe.