New Delhi, May 22 : Manoj Bajpayee tu tailaga nutun movie Bhaiyya Ji ke promote kuribole busy asey. Etu film tu May 24,2024 te release hobole asey. May 9, te etu movie laga trailer release huwa picheyte etu movie para online te already hungama machaidisey. Aro fans khan laga taraf para bisi attention aro tariff paisey. Manoj ke admire kora manu khan tu etu film laga trailer active para share kuri asey. Aro etu film nimitey taikhan laga josh aro khusi paikina thaka tu jataisey. Manoj tu tailaga professional kamyabi nimitey jana jai. Tai tu director Anurag Kahyap logotey dushmani thaka nimitey bi spotlight te ahisey. Ekta interview te Manoj para etu mamla ke discuss kurisey. Tai para explain kurisey ki taikhan laga majotey misunderstanding thaka tu ekta mamla ke loikina kotha nokora nimitey asey. Aro homoi kiman bitikina jai thakisey, etu chutu mamla ke social media te barai-charaikina pesh kurisey. Aro etu nimitey taikhan duijun bi sorom khaijaisey. Manoj para koisey ki taikey enaka lagisey ki Anurag tu enaka film banaithakisey kuntu taikey suit koranai. Aro Anurag para enaka bhabna kuri thakisey ki Manoj laga career giri asey. Etu nimitey taikhan duijun para bi eksath kaam kuribole laga jarurat dikhanai. Manoj para koisey, taikhan laga majotey ekta kotha ke loikina misunderstanding thakisey aro taikhan para etu mamla te kotha koranai. Aro etu tu social media tee man dangor hoijaisey ki kityabar jitya sorom kha laga bustu hoi mamla tu baraijai. Amikhan para kotha koranai, kilemaney amikey lagisey ki tai amilaga type laga film banaithakanaiaro taikey bi enaka lagisey ki etya Manoj Bajpayee laga dorkar nai kilemaney amilaga career girithakisey. Toh amikhan duijun bi nijor laga alag alag life enjoy kuri asey, taikey amilaga dorkar thakanai aro amikey tailaga dorkar thakanai
Manoj Bajpayee para Anurag Kashyap logotey jhamila chuli thaka te
