Nagaland logotey bisi potential asey hoilebi kitya bi pura nokora kosom aro hosa-hosi mamla ke charikina nijor ke promote kuribole kosis kora para etu state tu agey nabarikina asey. 2004 para yatey bisi investors’ summits huwa laga bawajut, etu state te ekta bi dangor investor(poisa invest kora manu) para investment koranai. Etu para ekta gehra structural problem aro hosa-hosi mamla ke importance nidiya tu dikhai asey. Naam-saam laga vision documents para ekta homoitey development laga dangor-dangor sapna dikhaisiley hoilebi eku bi change huwanai. Etu dangor kososm khan tu Nagaland ke agey loijabole laga bodli ekta sapna nisna thakikina, Nagaland ke diktar te fasaikina rakhidisey. Etu majotey successful entrepreneur aro business kora manu khan, kun ekta homoitey Nagaland te commerce aro services laga backbone thakisey, etu khan ke side te dhakaikina asey. Bisi entrepreneur aro business man khan tu bhitor manu aro association khan para tax aro fees laga roop te illegally poisa utha nimitey taikhan laga kaam charibole majbur hoikina asey. Etu group khan tu eku sajai napaikina enaka kaam kuriasey. Taikhan para hodai din laga jibon ke mushkil banaidikina business aro progress ke block kuriasey.Kun manu para taikhan ke challenge korey etu manu ke chup koraidiye, criticize korey aro dhomki diye. Bhoi aro chup-chap boha para enaka kaam ke encourage korey. Bisibhak manu tub hoi khaikina chup-chap thakey nohoiley kunlaga side bi noloikina thakey. Chameleon(situatin hisap te colour bodli kora puka) nisna bisi manu khan para taikhan laga support tu convenience hisap te change korey aro sachhayi aro insaaf nimitey khara nohoi. Enaka galat kaam laga khilaf tea was na-uthaikina chup-chap thaka para galat aro illegal kaam tu baribole dikina unity aro identity laga bunyad te banaikina thaka society ke kamjor kuridiye. Tribe aro gender(mota-maiki) te fark kora para etu situation ke aro biya kuridiye. Etu para manukhan ke eksath milikina kaam kuribole encourage kora laga bodli taikhan ke ek-dusra laga khilaf kuridiye. Leader khan tu galat kaam hoithaka, economic agey nabarikina thaka aro society laga value, nyom, structure khan biya hoithaka laga urgent mamla ke address kora bodli manu khan k eek-dusra laga khilaf kuridiya laga kotha cholai kuntu para manu khan laga bhabna ke harm korey. Shanti aro progress nimitey milikina kaam kuribole thaka tu ek-dusra logotey nimila laga hoijaisey, eku safa goal nathakikina. History(jaija laga homoi) para dikhaisey ki imandar aro strong leader laga bina, society tu bhak hoijabo.
Nagaland tu barithaka crime, kamjor authority aro social value khotom hoithaka logotey girithaka laga sign dikhai-asey Aro agey baribole nimitey, Nagaland para misa-misi kosom kha tu reject kuribole lagey, sacchayi laga samna kuribo lagey aro manu khan ekta hoikina, progress aro kamyabi logotey asol peace(shanti) anibole nimitey kaam kuribo lagey. Nagaland tu olta rasta te loija politics ke overcome kurikina hey aro ekbar agey baribo paribo. Nagaland ke tagra, imandar leader laga jarurat asey kun popularity laga opor te truth(asliyat) aro rajya ke bhal para chola ke value korey.
Democracy tu titya dikhibo jitya manu khan galat kaam laga khilaf tea was uthabo, etu bi pressure aro loyalty laga bhoi para nohoikina taikhan ki right asey etu kora te biswas rakha nimitey. Nagaland laga future tu etu laga youth opor te depend korey, kun khan bisi janikina asey aro poila laga golti para sikhibole parey. Change anibole nimitey, taikhan para manu khan ke alag-alag kuridiya politics aro misa-misi kotha ke reject kuribole lagey kuntu para society ke kamjor kuridiye.
Add Comment