“Democracy laga fourth pillar” laga roop te, media tu power te thaka khan para jawab olabole, information spread kuribole aro public ke sahi jankari janaidiya te ekta jaruri role nibhai. 2014 para loikina, Indian media laga noksa te ekta dangor change ahisey. Bisi mashoor media house khan ke ekta business organization para kiniloisey kun political party logotey direct nohoilebi indirect para jurikina asey. Etu tu inkar kuribole naparey ki Indian media laga noksa tu 2014 picheyte bisi bodli hoijaisey. Khas kurikinamedia laga ruling government logotey rishta thaka tu bisi change hoisey. Mainstream media para political events aro kahani cover kora te dikha-dikhi change ahisey. Journalism(news jama kurikina present kora) aro prachar kora majotey ekta line thaka tu blur(dhundla) hoijaisey. Kunba news channel khan para khula-khuli ruling party leader aro government policy khan ke taikhan laga eku golta aro kami te point nukurikina promote kuri asey hoilebi opposition party laga nakamyabi ke barai-charaikina dikhai asey.
2014 laga ageyte, Indian media channel khan tu political leader aro government laga faisla khan te bisi bhal para jaanch kuri thakisey. AAP laga Arvind Kejriwal nisna manu kun anti-corruption movement( IAC) logotey jurikina thakisey, tai para bi Congress aro UPA-II opor te hamla kurisey. Aro news channel aro newspaper khan hodai din imandari para etu news ke cover kuri thakisey. Aji Arvind Kejriwal ke lagiasey ki juta tu dusra theng te asey. Etu tu constitutional democracy nimitey ekta khatarnak isara asey. 2014 ageyte, mainstream media tu hodai Congress para chola UPA government laga golti olai thakisey, 2G, Coalgate aro Commonwealth Games te corruption kora nisna scam khan ke expose kurikina. Hoilebi, Congress laga government para news diya laga azadi logotey eman khili-mili koranai jiman ajikali laga government para kora dikhi asey. Media para UPA government khilaf te public laga soch bodli kuridiya te ekta dangor role nibhaisey, kuntu para 2014 laga election te UPA government ke haribole disey. 2014 picheyte, bhal para jaanch kurikina news diya tu ekdam komti hoijaisey, khas kurikina TV te. Corruption, government laga nakamyabi aro power laga galat istamal kora khan ke expose kuridiya laga investigative(bhal para jaanch kora) kahani khan tu mainstream news media te ekdam komti hoijaisey. Carrot aro lathi laga tu titya istamal kuri thakisey jitya BJP government para media laga advertisement te khorcha kora tu bisi baraidisey. Etu para bisi media house khan ke poisa nimitey government ad te depend kuribole disey. Etu para news likha aro present kora ke bi bias kuridisey. Dangor media network khan tu government laga support naharabole nimitey nijor-nijor para news ke modify kuriasey. Bari thaka corporization(profit nimitey kaam kora) para journalist khan ke ekta dhokadhari mohol te kaam kuribole diasey, kotey news diya laga haak tu advertiser, shareholder nohoilebi ruling party laga jarurat pura kuribole nimitey compromise hoijai. Indian mainstream media tu ruling government(BJP) logotey close hoija nimitey ‘Godi Media’ koikina ekta naam olaisey. Etu naam tu government laga mouthpiece(government laga support te news dikha) nisna kora mainstream news media ke describe kuribole bisi mashoor hoisey.
Mainstream TV news aro newspaper khan government laga side te hoijaisey koilebi online aro rajya laga media platform khan para independent aro bhal para jaanch kora journalism laga kami pura kuri asey. Social media platform jaiseki Instagram, Twitter, Facebook aro Youtube laga independent journalist khan para mainstream news channel para information diya nohoilebi kahani dikha ke challenge kurikina bisi dangor role nibhai asey.
Add Comment