Media kunlaga side te asey

Indian news media, kuntu ke democracy laga fourt pillar(democracy laga rakshak) maney, etu toh political party aro business laga iccha hisap te chola nimitey manu khan laga nazar te bisi ahi asey. Etu media khan tu desh ke etya cholai thaka political party para kinikina thaka nimitey nohoilebi taikhan para power te thaka manu khan laga iccha hisap te chulibole mon thaka nimitey etu hisap te news dikhai. Etu khan para media para khobor dikha tu hosa na misa asey etu te ekta doubt khara kuridiye. News media tu hosa-hosi khobor dikhabole laga platform nohoikina, nijor laga opinion share kurikina ekta party ke promote kuribole laga hathyar hoijaisey. Etu laga ekta dangor example tu Uttar Pradesh laga Prayagraj te chulithaka Mahakumbh Mela te ajikali hoithaka ghotna laga news cover kora laga tarika te dikhi asey. Ek faley media para etu laga bisi news  dikhai thakisey. Sob channel khan para Prayagraj ke taikhan laga main topic banailoisey. Media para Mahakumbh Mela laga khobor dikhai thaka tu dhorom laga bari te ekla thakanai. Mahaumbh Mela tu asol te ekta bisi dhormic gathering asey. Hoilebi media coveage para “Uttar Pradesh government” laga achievement laga bari te koikina power te thaka party(BJP) ke majority religion(Hindu) laga biswasi aro rakshak koikina dikhai asey. Media laga focus tu, hoi ek kisim te India laga progress dikhabole kosis kora tu bhal asey, hoilebi indirect para dhorom faley nohoikina political faley shift hoijaisey. Media para news cover kuribole chuney na 24X7 report kuribole chuney etu tu taikhan ke ki important lagey etu laga bari te asey. Hoilebi, media laga ekta important rule tu power te thaka manu khan ke public ke jawab dibole diya asey. Media tu etu rule hisap te chuli asey na nai etu laga test tu enaka homoitey ahisey jitya duita alag alag stampede(manu khan pola-poli kurikina ek-dusra ke chapiadiya) hoisey, ekta Mahakumbh Mel ate aro dusra Delhi laga railway station te,  kuntu te bisi manu laga jaan jaisey. Enaka ghotna te jawab aro kara para jaanch kuribole laga jarurat asey hoilebi ulta enaka mamla te media tu chup hoikina asey. NDA nohoilebi BJP para nochola states te enaka ghotna hoisey koiley media tu kisim-kisim laga news aro kotha khan olabole thakey. Media para Uttar Pradesh government ke Mahakumbh te huwa etu duita ghotna nimitey zimidar nodhora aro jawab namanga para media house khan para public nimitey kaam kora laga nohoikina ruling political party logotey taikhan laga rishta bhal kora ke prioritize kora tu dikhai asey. Enaka harkat para khali democracy laga nyom ke kamjor kuridiya ekla nohoikina media laga ekta watchdog(power te thaka manu khan laga kaam te nazar rakha) laga role ke bi kamjor kuriasey. News dikha te enaka differentiate(bhed-bhav) kora para media laga impartial(bhed-bhav nukuribole) laga commitment  aro political power laga mohra hoija laga opor te sawal khara korai asey. Dusra stampede(bhaga-bhagi huwa laga ghotna) tu Prayagraj te nohoikina February 15 te Delhi te hoisey, kotey train delay huwa nimitey hazar opor manu khan platform te jama hoikina thakisey. Prayagraj te jaithaka passenger laga number bisi barija nimitey railway syatem para etu dangor bhir ke bhal para manage kuribole napara hoijaisey. Desh laga manu khan etu janibole mon asey ki eman bisi manu laga jaan jaija laga zimidar kunke manibo. Aro yatey media ke nijor opor ke saikina bhal para bhabna kuribole laga jarurat asey.