Meghalaya: 18 morishe, lockdown aro May 24 dak othaishe

May 17, 2021. Tui(2) hafta oper para East Khasi Hills district te COVID-19 cases othi-thaka nemite, Meghalaya government para district sob te lockdown toh aro May 24 darik dak othaboli fesla korishe. District te lockdown aro extend koriboli toh Thursday din Shillong te chief minister Conrad K Sangma para meeting chaired kora samai fesla loishe. East Khasi Hills district te lockdown toh May 17 darik 5 am te kotom hoi thakishe. “aji COVID-19 halat nemite meeting korishe, district besi te cases othi-thaka khobor powa nemite Government para East Khasi Hills te lockdown jai thaka toh aro 24^th May 2021 dak othaboli fesla korishe,” koikena Chief Minister Conrad K Sangma para Twitter te junaishe. Thursday din Meghalaya te 1 din pithor laga cases toh sob sobse besi 591 positive cases thurishe aro 18 manuh mora khobor thakishe. Active cases toh 3,726 hoishe aro COVID bemar para 268 manuh morikena ase koishe. Thursday din state te 228 bhal howa cases khobor be paishe. 18 notun mora khobor te East Khasi Hills district para 16 ase aro East Jaiñtia Hills district aro West Jaiñtia Hills district para ekta-ekta mora khobor ase. East Khasi Hills district te active cases toh sobse besi 2,121 hoikena ase. Itya dak Meghalaya te sob melaikena 21,576 COVID-19 cases ase aro etu pithor te 17,582 bahl howa cases ase koishe.