Shillong, January 19 : Union Home Minister and Minister of Cooperation Amit Shah para Thursday (January 18) te Shillong laga Laitkor te thaka Assam Rifles Headquarter te cyber security operations centre inaugurate kurisey.
Etu occasion te kotha kurikina, Home Minister Shah para koisey ki Prime Minister Narendra Modi laga leadership under te, Bharat(India) tu digitalization fale ekta chutu mutu kadam uthai asey.
Etu Union Home Minister para koisey ki Modi sarkar tu desh laga sob manu nimitey internet ke secure banaidikina ekta cyber-success samaj banabole committed asey.
Tai para koisey ki cyber crimes(online te huwa crime) ke rokhaidiya tu Modi sarkar laga ekta priority asey.
Home Minister Shah para Assam Rifle khan ke taikhan laga operations ke modern(nutun jamana) hisap te cholabole mehnat kora niminitey tariff kurisey. Tai para koisey ki etu nutun inaugurate huwa cyber security operations centre para Assam Rifles Wide Area Network (ARWAN) te cyber network te nazar rakhikina, external khatra ke kom kuridikina aro online nohoilebi phone, computer, laptop khan cholaikina jurum kora tu rokhaidikina Assam Rifles laga cyber security posture ke majboot banabole asey.
Etu cyber security operations centre ke sobsey latest technology para bana network aro data ken ajar rakha device para banaisey, taki etu 24 ghonta kaam kuribo paribo. Home Minister Amit Shah para Assam Rifle laga force bhitor te digital service ke smooth aro suraksit banabole mehnat kora laga opor te khusi jataisey.
Sob Central Armed Police Forces (CAPFs) majotey enaka nisna cyber security operations centre bana tu etu first time asey. Ajikali cyber attack(phone, computer khan para hamla kora) tu bari thaka para Assam Rifle laga network ke fraud kora, hack kora aro alag cyber hamla khan para bachaikina rakhibole jaruri kuridisey.
Etu cyber security operations centre para Assam Rifle laga operation logotey jurikina thaka bisi alag alag aspect ke eksath milabole aro manage kuribole modod kuribo.
Add Comment