Shillong, February 06 : Meghalaya laga police para manu khan ke rajya te ekta nutun phone scam para bachikina thakibole koisey.
Etu scam te, call kora manu khan tu naam dangor thaka courier service jaiseki FedEx laga agent asey koikina manu khan ke chaliki kurikina etu biswas koraiidye ki taikhan para illegal bustu thaka package paisey.
Etu jaal laga suruwat tu kunba manu laga phone call para hoi kun khan para ekta courier company ke represent kora laga dawa korey.
Taikhan para call receive kora manu ke taikhan laga naam te thaka ekta package laga jankari diye aro enaka koi ki etu package te illegal bustu jaiseki drugs khan asey. Etu picheyte etu scam laga next stage suru hoi, kotey call kora manu para tailaga roop nohoilebi awas bodli kurikina law enforcement agency jaiseki Customs, CBI nohoilebi NCB laga official asey koikina koi.
Manu laga identity logotey gairkanooni tarika para poisa kama laga misa misi iljam lagaikina scam kora manu khan para “RBI clearance” nimitey bisi dangor kimat transfer kuribole pressure dhaley.
Manu khan ke arrest kuribole dhomki dikina, bhoi khilaidiya aro dhomki diya laga tarika cholai poisa pathabole nimitey.
Kunba mamla te, taikhan para manu khan ke AnyDesk nisna app download kuribole diye kuntu para taikhan ke manu khan laga personal information chor kuribole modod korey.
Police para etu case laga reports paikina, ekta kara advisory issue kurisey aro public khan ke savdhan hoikina thakibole aro delivery ke loikina misa misi call aha logotey deal kora homoitey savdhan thakibole koisey.
Add Comment