National

Meghalaya Minister : NPP tu HNLC logotey peace talk kuribole committed asey

January 9, 2024

Shillong, January 08 : Meghalaya laga ruling party- National People’s Party (NPP) para rajya laga ban hoikina thaka underground group Hynniewtrep National Liberation Council (HNLC) logotey peace talks(shanti laga baat-chit) kuribole committed  asey koikina janaisey

Etu janaikina, Meghalaya health minister Ampareen Lyngdoh para koisey ki NPP tu HNLC logotey shanti laga baat-chit kuribole committed aro pura dedicated(mondikina) thaki asey.

Ampareen Lyngdoh para koisey ki NPP para Meghalaya sarkar ke HNLC logotey shanti laga baat-chit logotey agey baribole salah dibo.

Monday (January 08) te media ke kotha kurikina, Meghalaya health minister para etu janaisey ki HNLC para union aro rajya laga sarkar logotey shanti laga agreement kuribole baat-chit kora para olaija laga mamla te official baat-chit hoisey.

Tai para biswas dilaisey ki NPP aro Meghalaya laga sarkar duijun bi HNLC logotey shanti laga baat-chit kora tu agey barabole committed asey aro lamba homoi tak shanti para thakibole nimitey ekjun-ekjun logotey buja buji hoikina thakibole aim kuri asey.

Etu majotey, Meghalaya laga ban hoikina thaka outfit Hynniewtrep National Liberation Council (HNLC) para union aro rajya laga sarkar logotey shanti laga baatchit kurithaka tu  wapas chalu kuribole nimitey ‘maaf kuridibole’ laga shart rakhisey.

Etu jankari dikina, HNLC laga interlocutor(taikhan laga behalf te kotha kuridiya manu) Sadon Blah para koisey ki shanti laga baat-chit tu titya hey wapas chalu kuribo paribo judi central aro Meghalaya laga sarkar tu etu group laga leader khan ke taikhan laha harkat nimitey ‘maafi’ dibo paribo.

Sadon Blah para koisey ki judi taikhan para shanti laga process ke agey baribole dibole mon asey koileysarkar tu strict para kanooni process nocholabo lagey hoilebi etu laga bodli ekta rajneetik tarika cholabo lagey.

HNLC laga demand te Unlawful Activities (Prevention) Act laga under te taikhan laga opor te ban lagaidiya tu hataidibole aro taikhan laga member laga khilaf te thaka sob pending case ke hataidibole laga shamil asey.

Taikhan para jail hoikina thaka HNLC member aro taikhan logotey jurikina asey koikina suspect thaka manu khan ke reha kuridibole aro HNLC laga sob member khan laga against te charges laga tu hataidibole bi demand kurisey.

Etu group para dawa kurisey ki taikhan para taikhan laga demand ke highlight kuribole nimitey lagatar kosis kora laga bawajut bi sarkar para taikhan laga demand pura kuribole ekdam olop kosis kora nohoilebi mon thaka dikhaisey.

Olop din ageyte HNLC laga top leader jaiseki Bobby Marwein, Marius Rynjah aro Sainkupar Nongtaw ke National Investigating Agency (NIA) court aro Shillong Judicial Magistrate Court para pesh hobole order patahisey.

HNLC tu central aro Meghalaya laga sarkar logotey shanti laga baat-chit kurithaka para olaiijaisey.