Shillong, November 28 : Meghalaya police para oil tanker driver khan ke parishan kora picheyte, North East Petroleum Mazdoor Union (NEPMU) para November 29 para loikina Meghalaya te IOCL, BPCL aro HPCL petrol laga supply rokhaidibole faisla kurisey.
Minister of Food, Civil Supply and Consumer Affairs ke ekta letter path ate, Meghalaya laga sarkar, NE Petroleum Mazdoor Union para koisey ki November 24 para loikina, Meghalaya Police personnel khan para Meghalaya laga Ri Bhoi district te(18th Mile para suru kurikina) oil(tail) tanker driver khan ke galat kaam kora laga naam te torture kuri asey.
Etu letter te likhikina thakisey, “Taikhan para 29 November, 2023 para loikina IOCL, BPCL aro HPCL Meghalaya(Petroleum products) nimitey eku load nolobole laga bi faisla kurisey, etu mamla thik thak nohoija tak.”
General Secretary Ramen Das para koisey, “ 24-11-2023 para loikina Meghalaya police para amikhan laga member Oil Tanker Driver aro helper khan ke Ri-Bhoi District area te 18 Mile para suru hoikina galat kaam kora laga naam te torture kurikina ahi asey. Taikhan para joborjosti kunba Tanker khan ke dhurisey kun khan 22 Mile te khana khabole nimitey Dhaba laga bahar te fasikina thakisey aro taikhan laga khilaf te case register kurisey. Next din te bi Police para eku karon nathakikina load hoikina thaka Tanker ke rokhaisey. Etu laga natija tu eku golti nathaka Tanker laga crew khan tu diktar jheli thakisey. Etu situation ke saikina tanker laga driver khan tu Meghalaya te kaccha petrol laga load loijabole aro Meghalaya te gusibole bi bhoi khai asey.
Das para ekta letter te koisey ki worker khan laga behalf te, judi police khan para taikhan ke rangey haath dhurisey koiley authority khan para kanoon hisap te action lobo parey. NEPMU para bi eku compromise nukuriina authority logotey co-operate kuribo. Hoilebi galat kaam kora laga naam te kunba innocent manu ke parishan nukuribo lagey.
Add Comment