June 18, 2021. Meghalaya te 14 umer neji bacha 5,000 nehina logot Covid-19 positive tested thurishe aro etu bemari para 17 bacha khan morishe koishe. Health officials para janaishe ke, state te jowa saal Covid-19 bemar soruh kora beche 14 saal umer bacha 5,101 nehina logot positive thurikena ase. Hoilebi, 4,344 neshina toh bemar bhal hoishe aro 17 jun morishe. Baki bacha khan toh alag-alag hospital te elaj kori ase koishe. Bacha besi wala toh jowa 1 moina akhe te bemar toh thura ase koishe. “May 15 para soruh hoikena 2,950 bacha logot Covid-19 positive tested paishe, etu pithor te 2,821 bacha khan bemar bhal hoishe aro etu samai te 13 bacha neshina morishe,” koikena official para janaishe. Sobse notun khobor toh East Garo Hills district te 4 saal umer maiki bacha ek jun bemari para etu moina soruh howa samai morishe. Health minister Alexander Laloo Hek koishe ke, state te itya dak etu bemar para notun jonok howa bacha logot toh bemar nahoikena ase. Tai para aro janaishe ke, bacha pithor te Covid-19 cases besi othi-thaka nemite, government para Shillong, Tura in West Garo Hills, aro Jowai in West Jaintia Hills te paediatric hospitals bonaboli fesla korishe. Itya dak Meghalaya te 43,253 Covid positive cases khobor ase aro 38,032 jun bemar para bhal hoishe aro 758 manuh etu bemar para morishe. Thursday din dak Meghalaya te active cases toh 4,464 thakishe.
Meghalaya te 5,000 bacha ke Covid(+v) thurishe, 17 morishe
