Nagaland Board of School Education (NBSE) para 2024 laga Class XI Promotion Exam laga answer script ke check kora para Nagaland laga education halat ke loikina ekta chinta koraidiya laga mamla olai di asey. NBSE para etu answer paper khan check kora para pora-likha te ekta clear gap thaka dikhaia sey. Kuntu para student laga exam nimitey tayari kora aro teacher khan para sikha laga tarika duita te bi systematic failure(nakaam huwa) dikhai asey.
Jaanch kora homoitey observe kora hisap te, etu mamla laga centre te ki asey koiley, student khan majotey basic(suruwat laga) knowledge, comprehension aro reading skills laga kami asey. Etu tu asurit kuridiya laga asey ki 10 years laga formal education(pora likha) complete kora bisi Class XI student khan tu ekdam aam concept bi bujibole naparikina asey. Etu para khali student khan laga side para fail(nakam) huwa tu hey dikha nohoikina rajya te education diya system te ekta dangor golti thaka bi dikhai asey.
NBSE para student khan Multiple Choice Questions(MCQs) tak bi kuribole dukh pa para class te sikha laga tarika aro student khan class te dhyan diya duita etu duita laga opor te bi sawal khara korai asey. Khas kurikina English language laga performance para etu dangor problem te olop jhalak di asey. Student khan para direct(sidha) question laga answer dibole napara, sentence bhal para banabole napara aro spelling mistake kora para taikhan laga foundational(suruwati) learning(sikha) te ekta dangor khot thaka tu dikhai asey.
Etu khoj ke support kurikina, Annual Status of Education Report (ASER) para ekta chinta koraidiya laga number disey. ASER 2024 para reveal kurisey ki Nagaland te English puribole pariya tu bisi high asey hoilebi bujibole pariya tu komti asey. Nagaland te, Class 1 level laga text puribole pariya student khan majotey khali 54.8% student para hey dawai laga packet te thaka instruction ke bujibole parey. Jabki pura desh te 65.1% asey. ASER 2022 laga data para aro bisi chinta kuridiya laga mamla dikhaia sey. Class 5 aro Class 8 te pora baccha khan majotey English puribole para aro bujibole para tu komti hoi asey.
Etu chinta ke baraidikina, student khan para secondary education(Class 9-10) complete nukurikina adha para pora-likha charidiya laga rate tu bisi baria sey. Unified District Information System for Educaqtion Plus (UDISE+) 2021-22 report laga hisap te, Nagaland te Class 9-10 laga dropout(pora-likha aro school charidiya) rate tu 17.5% te thaki asey. Etu rate para education(pora likha) laga jaruri stage te student ke dhurikina rakha te bisi dangor problem thaka dikhai asey.
NBSE laga report para etu diktar khan ke thik kuribole laga recommendation(salah) di asey. Aro etu kuribole nimitey ekta jaruri kadam tu etya cholai thaka lesson ke memorise kurikina sikha aro spoon-feeding(sob kuch asani para provide kora) kora laga tarika ke hataikina baccha khan ke nijor laga dimak cholabole diya aro lesson ke bujibole diya aro nijor para sikhibole diya laga tarika cholabo lagey.
Add Comment