Nagaland te school aru college te porha students khan karone ekta dangor problem chuli ase, kintu etu problem etiya bhi manu khan na dekhi, aru bishi time chup chap thaki jai. Mental health, specially students khan laga mental health, ekta serious matter ase, kintu etu problem te amikhan kom kota kure, mon nade, aru kom action loi. Etu silent crisis, aru eneka thakile, etu future generation karone dangor danger hobo pare.
Nagaland te, mental health problem te openly kotha koa biya mane jai. Society te, especially rural area khan, logote mental stress ase koi dikhabo hoile, bishi manu na bujhe. Kunba manu to eneka mon kure, jodi ekjon student depression te ase, nahoile confident nai, aru exam te fail kurise, etu tai weakness ase koi. Etu thinking karone, students khan nijor problems te chup thaki jai. Etu silence to aru bishi dangerous hoijai.
Aji kali, academic pressure, online comparison, family expectations, job opportunity nahua, aru substance abuse, etu sob mili kena students khan opor heavy pressure di ase. Ekjon student ke mon opor etya dangor burden ase; exam te top kuribo lage, future plan ready thakibo lage, parents khan ke satisfy kuribo lage. Social media te dusra manu laga life dekhi kena, nijor life ke compare kuri kena stress ula toh normal hoi ase. Etu modern digital pressure bhi mental health te affect kure.
Nagaland te, mental health help pai thaka jagah kom ase. School aru college te proper counselor nai. Bishi school te teachers bhi etu rasta te training nai. Students khan, juntu mentally struggle kuri ase, khali friend nahoile family logote share kuribo pare, kintu tai khan logote share kurile bhi, tai khan help kuribo napare, karon tai khan bhi training na thake. Rural area te toh hospital te bhi mental health department nai.
COVID-19 pandemic etu problem ke aru bishi biya banai dise. Lockdown te students khan nijor home te thaki kena lonely feel kurise. Online class toh bishi jagah te properly hobo napare, mobile, internet, environment sob problem ase. Etu bhi students laga mental stress barai dise.
Kintu, sob negative nahoi. Ekta positive change bhi ase. Nagaland te kunba NGOs aru schools mental health awareness program start kuri ase. Youth logote social media use kuri kena mental health laga rasta te kotha koi ase. Awareness uthai ase, etu suru bhal ase, kintu etiya bhi bishi kuribo lagi ase.
Nagaland government, school management, aru parents khan milaikena etu problem ke serious loi kena help kuribo lage. Government counselor appoint kuribo lage school khan te. Mental health education ke curriculum te include kuribo lage. Teachers khan ke train kuribo lage, jate tai khan bujhibo pare, student kun bhabi ase, kun stress te ase. Parents khan bhi nijor bacha khan ke support kuri kena, morom dibo lage, judgement na hoi kena, understanding lage.
Students khan Nagaland laga present aru future ase. Jodi amikhan etya bhi mental health rasta te serious na hoi, tate notun generation danger te jabo. Academic result important ase, kintu ekta student laga mon bhal thakile, result bhi bhal hobo.
Mental health karone chup thaka time to rukhibo lage. Aji kali mental health important ase, aru support lage. Aru student khan ke tai khan ekla nahoi koi kena biswas dibo lage.
Add Comment