Dimapur, 12 January: January 10 direk Kilo Old Village jaga deh Satakha Range Students’ Union (SRSU) laga 34th biennial conference toh theme “Quest for Excellence” pethor deh suru korishe.
January 10 direk Introductory session time deh Kakuto Shohe, former President SRSU toh resource manu thakishe. Programme time deh, Nikhuje Swu, Head GB Kilo Old Village para welcome kotha janaishe aro President, GB’s Association Satakha Area, Hokugha Chishi para be jama howah jaga deh kotha korishe.
Speech time deh Kakuto para student khan logode first Isor ke besaribole janaishe aro nejor laga kaam toh duniya laga bostu ke mon nadekena nejor laga kaam ke mon debole janaishe. Tai para be student khan logode nejor laga identity aro culture ke janikena thek para rakhibole janaishe.
January 11 direk deh inaugural session toh special guest Minister for Agriculture and Cooperation, G. Kaito Aye logode manaishe. All Sumi Students’ Union, Atokiho Sumi be jaam howah deh kotha korise.
Inaugural session bechide, students para alag-alag games aro sports loise. Etu lowah ke indigenous games aro cultural items be lowah thakise.
Cultural session toh January 11 saam resource speaker Dr. Hotokhu Chishi, Joint Director, H&FW Department logode loise. Etu time deh speaker laga topic toh “Sumi of Today” thakise.
Add Comment