New Delhi, 5 February : Olympic silver medallist Mirabai Chanu Budhbar din Uttar Pradesh laga Modinagar te hoise National Weightlifting Championship 2026 te tinta National Record bhangise.
31 umar laga Mirabai, 48kg category te compete kori, snatch te 89kg aru Clean & Jerk te 116kg best lift record korise. Total 205kg lift kori tai podium te first position paise, nijor nearest competitor pora pura 22kg agey te finish kori.
Tai 91kg lift kori record aru improve koribo try korise, kintu etu successful nohoi. Itu majot Radha Soni silver aru Komal Kohar bronze medal secure korise.
Olympic weight class laga rejig hua pichete, Mirabai Chanu 2025 te 49kg division pora abar 48kg category te ghuri ahise. 49kg category te Mirabai laga personal best total 205kg (86 + 119) ase, juntu tai 2021 Asian Championships te achieve korise.
Championship te 30 State aru U.T. pora lagbhag 790 athlete aru tinta Departmental Board laga participant ahibo, aru pura 12 din dhori competition cholibo.
Add Comment