Regional

Mizoram CM, first security coordination meet hold kurishey 

9 months ago

Mizoram, 10 June : Aizawl te aji Mizoram Chief Minister Pu Lalduhoma laga leadership te Mizoram Security Coordination Committee laga prothom meeting hoise. Etu committee banai dya hoise jate alag-alag department aru agency milke kaam kori pare Mizoram laga border protect koribole aru state te overall safety ensure koribole.

Meeting te main focus thakise Indo-Myanmar aru Indo-Bangladesh border te thaka security situation upor. Mizoram laga internal boundary, juntu dusra northeast state logot share kori ase, itu bhi discuss kora hoise. Border infiltration aru armed groups laga movement upor bhi serious discussion hoise, aru ki ki step future te lobole lage itu bhi ulai aise.

Tripura-Mizoram border laga situation, especially New Kawnpui area te, ekta specific point thakise. Officials koise ki Tripura State Rifles pora establish kora temporary check post aru sentry shed etiya hatai disey. Itu peacefully resolve kora hoise senior level discussion pora — juntu te Chief Secretaries aru DGPs khan involve thakise.

Meeting te sabse dangor concern dikhai disey drug trafficking. 2024 te total 338 ta case file kora hoise under ND&PS Act. 2025 te, May month tak already 114 notun case record kora jaise. Huge quantity illegal drugs seize kora hoise — jiman methamphetamine tablet seize kora hoise etu 648 kilogram pora besi ase, juntu value ase approx Rs. 84 crore. Upor te 5 kg crystal meth bhi pakra jaise, value ase around Rs. 15.5 crore.

Drug-related crimes laga alawa, POCSO Act under thaka child sexual abuse case increase kori ase buli bhi concern uthai disey. Human trafficking bhi ekta dangor problem bonai ase. 2024 te 47 ta case report hoise aru 56 jon arrest kora hoise. 2025 te, May tak 34 ta notun case file kora hoise aru 51 jon ke arrest kora hoise.

Dusra important discussion te ILP (Inner Line Permit) system ke tight aru efficient koribole dorkar ase buli uthai disey, jate bahar pora aneka manu easily enter nohoi. One Nation One Ration Card scheme ke better implement koribole bhi discuss kora hoise — especially juntu Manipur te violence karone ahi thaka refugee logot relate ase. Foreign tourist logot relate kora ILP process ke bhi easy banai dibole kotha uthai disey jate tourism promote kora jai.