Aizawl, October 27 : Bharatiya Janata Party (BJP) National President Jagat Prakash Nadda para October 27 te Mizoram te hobole thaka election nimitey party laga manifesto release kurisey.
Nadda para etu manifesto nohoilebi party laga vision document tu etu party laga Aizawl te thaka state head office te ekta ceremony hoithaka homoitey release kurisey. Aro etu event te mojud thaka manu khan tu Union Minister Kiren Rijuju, Nagaland Deputy Chief Minister Y Patton aro alag khan bi mojud thakisey.
Etu vision document laga salient features laga kotha kurikina, JP Nadda para koisey ki BJP para rajya laga youth khan laga majotey drug addiction komabole nimitey ‘Drug Free Mizoram’ koikina ekta operation launch kuribole asey.
Nadda para etu bi koisey ki BJP para ‘Mizoram Education Upgrade’ aro ‘Zirlai Simathawana Mission’ koikina ekta mission launch kurisey kun logotey sobsey latest technology para already mojud thaka sarkari school aro college khan ke aro upgrade kuribole nimitey Rs 250 crore aro Rs 350 crore laga budget rakhisey.
Nadda para agey barikina koisey ki BJP para etu bi commit kurisey ki taikhan para Mizoram Sports Academy banabole asey kuntu toh khilari hobole monjai thaka manu khan nimitey fully funded hobo aro scholarship bi thakibo. Tai para etu kotha tu football, wrestling, weightlifting, hockey aro badminton te strong emphasis dikina koisey.
Etu BJP National President para etu bi ailan kurisey ki taikhan para Mizoram ke ekta sports te agey thaka rajya banabole aro Mizo Youth khan para Olympics laga medal tally te contribute kuribole dibo.
Taikhan para etu bi ailan kurisey ki taikhan para Zoram Medical College ke Regional Institute of Medical Sciences (RIMS) te upgrade kuribole nimitey Central government logotey milikina kaam kuribo.
Nadda para agey barikina koisey ki taikhan para Mizoram te Queen Ropuiliani Women Empowerment Scheme introduce kuribole asey kotey sob chukri baccha ke Rs 1.5 lakh tak laga poisa modod dibo.
Nadda para aro ekta dangor announcement kurisey ki BJP para sarkari sector te maiki khan nimitey 33% job reserve kurikina rakhibo.
Health sector laga kotha kurikina, Nadda para announce kurisey ki BJP para Ayushman Bharat Scheme laga under te ek saal laga health insurance coverage tu Rs 5 lakh para baraikina Rs 10 lakh kuridibo.
Tai para etu bi ailan kurisey ki Pradhan Mantri Kisan Sammaan Nidhi Scheme laga under te kisan khan ke Rs 6000 laga poisa laga modod diya tu baraikina Rs 8000 kuridibo. BJP para sob level te Mizoram laga agricultural subidha ke wapas bhal para banabole nimitey Rs 1000 crore laga investment logotey Mizo Agri Mission bi introduce kuribole asey.
Nadda para aro ekta dangor announcement kora tu etu thakisey ki Central government aro Assam government para Mizoram laga Assam logotey interstate border laga jhamila hoithaka tu thik kuribole nimitey kaam kuribo. Tai para etu bi koisey ki taikhan para ki halat te bi Mizoram te thaka manu khan laga haak ke bachaikina rakhibo.
Add Comment