Aizawl, October 29 : Prime Minister Narendra Modi para October 30 te voting hobole thaka rajya Mizoram laga Mamit jaga te plan kora campaign trip cancel kuridiya picheyte, Union Home Minister Amit Shah para tailaga bodli tatey jabole asey.
BJP media convenor Johny Lalthanpuia para koisey ki Union Home Minister Amit Shah para PM Modi laga jaga fill kuribole asey hoilebi tai para kuntu tarik te campaign kuribole asey etu laga faisla tu etya bi kuribole baki asey. Hoilebi Lalthanpuia para PM Modi para Mizoram aha laga plan cancel kuridiya laga eku karon kuwanai.
Lalthanpuia para koisey ki aro ekjun senior BJP leader aro Union Minister Nitin Gadkari para bi Monday din te Mizoram te election nimitey campaign kuribole asey.
Tai para koisey ki Amit Shah para Mizoram laga Mamit jaga aro south fale thaka jaga khan visit kuribo. BJP para tatey laga minorities jaiseki Chakma, Bru, Mara aro Lai community laga manu khan laga vote pabole kosis kuri asey.
BJP party kun para 2018 te huwa assembly election te 39 seat seat para election larisey etu party para etu baar 23 nominee ke chunisey. BJP President JP Nadda para Friday din te party laga manifesto(jitisey koiley ki ki kuribo etu likhikikina thaka kitab) release kurisey aro government job te maiki nimitey 33% reservation aro Assam logotey bisi homoi para border laga jhamila chuli thaka te solution anibole laga bi kosom khaisey.
Add Comment