Mizoram: Orphanage te 46 jun ke Covid(+v) thurishe

July 9, 2021. Thursday din Mizoram te ek din laga COVID-19 cases toh sobse besi thakishe koishe. June 30 darik te lockdown relaxation kora beche 548 manuh pithor te orphanage aro rehabilitation centre te 46 manuh logot COVID-19 positive paishe, etu melaikena Mizoram te bemari cases toh 22,703 hoikena ase. State information & public relations departments laga official statement hesab te ek din pithor laga positivity rate toh 16.88 per cent thakishe aro etu notun Covid-19 cases toh 3,245 sample tests lowa te thura ase koishe. 548 notun cases pithor te Aizawl district te sobse besi 196 cases paishe, etu beche Lawngtlai district te 174 aro Kolasib district te 81 cases thurishe koishe. Bacha khan 88 jun aro  Border Security Force (BSF) laga 4 jawans khan etu notun cases thura te samil ase koishe. Aro etu notun cases pithor te bosti ekta ekla para 170 cases thurishe. 21 bemar manuh khan logot travel history thakishe aro baki 527 toh locally thura ase koishe. 167 manuh logot Covid-19 symptoms paishe. Mizoram te itya 3,959 COVID-19 active cases ase aro 18,643 manuh bemari bhal hoikena ase. State te COVID-19 bemar para manuh mora toh 101 hoikena ase, etu pithor 24 gonda majot te aro tui(2) jun bemar para mora khobor paishe, koikena health department official para khobor toh janaishe. COVID-19 bemar pithor te bhal howa rate toh 88.11 per cent ase. Mizoram te itya dak COVID-19 samples toh 5,13,712 neshina tested korikena ase. State immunization officer Dr. Lalzawmi para janaishe ke, Wednesday din dak te 5.5 lakh manuh logot vaccine doses thikena ase.