Aizawl, 18 March : Mizoram sorkar April 1 pora Mizoram Universal Healthcare Scheme (MUHCS) launch kuribo ase, jun laga hisab te ekta family karone Rs 5 lakh pora annual coverage dibo. Itu scheme laga aim ase alak alak economic background pora thaka residents khanke, including government employees khanke, cashless medical treatment dibole karone.
Health Minister Lalrinpuii March 16 te itu development confirm kuri dise aru koise ki scheme laga official launch karone Chief Minister Lalduhoma logote March 17 Monday din discussion hobo. MUHCS Ayushman Bharat-Pradhan Mantri Jan Arogya Yojana (AB PM-JAY) logote align kuribo aru pre-existing conditions aru hospitalisation expenses cover kuribo.
Itu scheme hisab te, beneficiaries khan state-run hospitals, primary healthcare centres, aru empanelled private nohoile church-run hospitals te free treatment paibo. Mizoram laga southern region te bishi hospitals khan itu scheme implement kuribo karone interest dikhai dise, kintu state capital Aizawl te thaka private hospitals logote negotiations cholai thakise.
Itu scheme karone registration March pora shuru hoise aru May tak cholibo. Offline registration sub-health centres pora facilitate kuri ase, aru online registration April te shuru hobo. May deadline piche te, registration July te reopen hobo penalty fee logai dibole.
Itu scheme te general ward, semi-private ward aru private ward facilities karone contribution-based plans thakibo aru government employees khan, including contractual aru muster-roll staff khan, monthly premium pay kuribo lagibo juntu Rs 200 pora Rs 1,500 tak hobo.
Add Comment