Aizawl, 11 March : Mizoram laga Home Minister K Sapdanga Assembly te janaise ki state human rights commission (SHRC) shuru kuribole kotha ase. Itu karone October 11, 2024 te human rights panel laga bhal post khan bonabo karone ekta notification ulai dise.
November last year te ekta search committee bonai dise chairperson aru baki members recommend kuribole karone. Human rights panel karone thik thak building arrange kura kaam cholise aru alag se pai khan rakhibole head of account create kuribo karone bhi kaam cholise, Sapdanga koishe.
Bohot saal deri hobo pichete, Gauhati High Court laga Aizawl bench September 6 last year te Mizoram government ke final duita month deadline dise SHRC bonai lobole karone, aru warning dise ki jodi time limit andorot na parile contempt proceedings suru hobo.
Tai karone, state government October te SHRC establish kura khobor janaise. November 27 last year te ekta hearing time te, government laga advocate H. Lalmalsawmi Division bench, Justice Nelson Sailo aru Justice Marli Vankung ke janaise ki state government already court laga directive hisab te human rights panel form kurise Protection of Human Rights Act, 1993 laga section 21(4) & (1) hisab te, aru itu laga headquarters Aizawl te rakha ase October 11, 2024 te.
Tai court ke janaise ki notun establishment karone 16 post, chairperson aru duita member milaikene bonai dise. State government laga positive steps dekhi kene, division bench directive dise ki bhal manuh ke appoint kurikene chairperson aru members bonai lobo karone age bhi steps lobole.
Add Comment