Aizawl, November 12 : Mizoram laga Muallungthu polling station(vote diya jaga) te thaka ekjun ekjun polling official(vote diya homoitey thaka officer) ke tailga official duty laga nyom bhanga nimitey aro document jaali bana nimitey suspend kuridisey.
State agricultural deoartment secretary para Saturday din te ekta official order issue kora te department laga deputy director Lalremmawia Colney ke suspend kuridisey kun November 7 te voting huwa homoitey Aizawl South-III assembly bhitor te thaka Muallungthu polling station te presiding officer thakisey.
Etu order te koisey ki etu officer laga khilaf te Muallungthu voting station te official duty laga nyom bhanga nimitey aro document khan ke jaali bana nimitey Election Commission para instruction diya hisap te departmental karawahi suru kuridisey.
Colney ke logalog suspend kuridisey.
Order diya hisap te tai tu tailaga khilaf te karawahi chuli thaka homoitey adhikari khan laga permission noloikina Aizawl charikina jabole allowed nai.
November 7 te 40-member Mizoram assembly nimitey 1,276 voting station te vote dhala tu shanti laga mohol te hoisey.
Muallungthu voting station te November 10 te aro nutun para voting kurisey kilemaney November 7 te vote kuribole laga agaye te, polling official khan para ‘mock poll’ clear kuribole paranai.
Election department para kuwa hisap te, total vote dibole aha manu tu,Muallungthu voting station te aro nutun para voting huwa ke milaikina 80.66% thakisey.
Hoilebi, State election department official khan para koisey ki total kiman manu vote disey etu tu vote ginti kora din te hey janibo kilemaney post para patha vote khan tu EVM para diyanai.
Ghor te vote diya aro vote post kurikina path ate pura puri 15,061 manu khan bhak loisey kuntu te 80 years bara bisi thaka bura buri aro gao thik thak nathaka manu khan para vote dhalisey.
Mizoram te 8.57 lakh opor vote diya manu khan thakisey kuntu te 4.39 lakh maiki voter khan bi shamila sey.
Add Comment