Mizoram te 1,088 notun cases thurishe

August 05, 2021. Friday din Mizoram te 1,088 Covid-19 cases thura te sob melaikena 26,207 pongchise, etu oper te bemar toh 100 bacha logot be thurishe, koikena health department official para khobor toh janaishe. State te aro Covid-19 bemar para 1 jun mora khobor paishe, etu melaikena 117 manuh morikena ase koishe. 456 notun cases toh alag-alag district para thakishe aro Aizawl te sobse besi 271 cases thurishe, etu beche Kolasib  te 62 cases aro Lunglei district te 58 cases thurishe koishe. 87 notun cases toh Zoram Medical College (ZMC) te RT-PCR laboratory para thura ase, 26 cases toh TrueNat facilities para thurishe aro dosura 343 cases toh alag-alag district Rapid Antigen test para thurishe. 14 bemar manuh toh travel history thakishe aro baki dosura toh locally thura ase, koikena officials para janaishe. 268 manuh toh COVID-19 symptoms thura te 188 jun toh asymptomatic ase. Ek din laga positive rate toh 10 per cent ase aro notun cases toh 4,537 samples tests lowa te thurishe. Mizoram te itya 5,612 COVID-19 active cases ase aro etu samai 20,478 manuh toh bemar bhal hoikena ase. COVID-19 bemar manuh laga recovery rate toh 78.13 per cent ase aro mora rate toh 0.44 per cent hoikena ase. Itya dak state te 5.46 lakh samples test loikena ase. State immunisation officer Dr. Lalzawmi laga khobor hesab te Thursday din dak te 5.96 lakh manuh logot vaccine thikena ase, etu pithor te 1.17 lakh manuh toh Covid-19 vaccine tuita(2) dose be loikena ase. Etu samai, Mizoram government para Covid-19 guidelines toh July 17 rati dak othai-kena ase koishe.