Aizawl, October 26 : Ekjun senior election official para koisey ki November 7 te Mizoram te hobole thaka assembly election laga agey te komsikom 3,000 police aro central armed police force (CAPFs) laga 450 section ke duty te dhalibole asey.
Mizoram Chief Electoral Officer (CEO) Madhup Vyas para koisey ki etu poll panel para election ke smooth, free, fair aro shanti laga banabole nimitey bisi takat lagai asey.
Tai para Aizawl te reporter khan ke enaka kosiey, “ BSF laga 10ta company aro CRPF aro Sashastra Seema Bal (SSB) laga 5ta company tu already Mizoram te pungchijaisey. Aro taikhan tu taikhan ke duty diya laga jag ate asey.” Ekta section te 12 sipahi thakey. Etu nimitey 450 section te CAPF laga 5,400 sipahi thakibo.
Vyas para koisey voting huwa din te Aizawl te ekta helicopter bi rakhibo. Tai para kuwa hisap te, election laga tarik ailan kora homoi para loikina etya tak Rs 36.32 crore laga poisa, drugs, mudu aro alag saman khan dhurisey. 40-member Mizoram Assembly Election tu November 7 te ekta single phase te rakhibole asey aro vote laga ginti tu Dece,ber 3 te hobole asey.
Vyas para koisey ki Chief Electoral Officer laga office para alag alag rajneetik party khan laga taraf para vote ginti kora laga tarik bodli kuribole laga request paisey kilemaney etu tu Sunday din te giri asey kuntu toh Christian manu khan nimitey ekta pavitra din asey . Etu request letter khan tu Election Commission ke forward kuridisey.
Central poll panel para etya tak bi etu request khan te jawab diyanai.
Add Comment