Mizoram, 14 October : Mizoram sorkar etia step loi ase train te ahibola visitor khan laga Inner Line Permit (ILP) issue kora process ke easy banabo karone, itu officials khan koi dise. ILP to dangor requirement hoi jaise state khan te jabo karone, jiman state te ILP lage — itu majot Mizoram bhi ase. Itu requirement to especially dangor hoi jaise kitia para Mizoram national railway network te connect hoi jaise last mahina te.
Home Minister K. Sapdanga October 14 te Aizawl pora around 20 km dur te thaka Sairang railway station visit korise passenger reception aru ILP process check koribo karone. Tai railway officials, police aru state authority khan logot bi meeting korise kutey ILP issue kora process aru smooth banai lobo pare.
Sapdanga koi dise ki government 2019 te online ILP portal introduce korise aru etia train te ahibola non-tribal traveller khan karone offline form ready koribo suru korise. Online system bhi upgrade kori ase aru complete hoijabo ase. Tai suggest korise ki station te duita alag exit gate banabo — ekta ILP lage thaka passenger khan karone aru ekta jitu lage nai, kutey bheer kom ase.
Visit time te Home Minister koise ki Sairang railway station upgrade koribo bahut zaruri ase. Officials khan janai dise ki prottek train te around 250–300 passenger ahibo. Prime Minister Narendra Modi September 13 te 51.38 km Bairabi–Sairang railway line inaugurate korise aru Delhi, Kolkata aru Guwahati jabo train flag off korise.
NF Railway laga Deputy Chief Engineer Harjimal Meena Sapdanga ke station te cholithaka project bisare janai dise, kiman majot ekta naya rail terminal bhi ase jitu duita saal te complete hoi jabo. Tourist facilitation centre banabo laga plan bhi discuss korise jate visitor khan ke help koribo pare.
Sapdanga logot Chief Secretary Khilli Ram Meena, DGP Sharad Agarwal aru dusra senior officials khan bhi thakise.
Add Comment