Mokokchung, 8 May 2025: Mokokchung te Deputy Commissioner Thsuvisie Phoji karone ekta farewell programme 7th May 2025 din DC Office, Mokokchung laga Conference Hall te loise.
Thsuvisie Phoji, nijor farewell speech te Mokokchung laga manu khan ke dhanyobad janai dise, jun khan 3 saal tai district te thaka time te bhal support aru morom dekhaise. Tai alag alag department laga officer khan, administrative officer, Police Department (Superintendent of Police laga lead te), civil society aru institution khan ke bhi dhanyobad janai dise bhal guide aru morom dekha parah. Tai koise jodi kunba bhal kaam tai kurise, etu to public laga reflection aru Isor laga grace para ase. Tai janai dise ki upcoming Deputy Commissioner ke bhi same support aru guidance dibo lage, karon ekta manu para community te bisi change anibo nahoi, hoilebi teamwork aru eki logot kaam kura important ase jodi age te jabole karone.
Nijor short speech te ahibo thaka noutun Deputy Commissioner, Mokokchung, Ajit Kumar Verma, IAS, janai dise ki Mokokchung ke tai nijor ekta bacha nishina consider kuribole, karon tai probationer hoa time te Mokokchung para administrative kaam sikhi thaka se. Tai koise tai ekta young officer ase, aru tai etya bhi learning phase te ase, tai officers, civil societies aru office staff laga support lagi ase. Tai encourage kuri kena janai dise ki public khan suggestion loi ahi thakibo lage, jate district bhal direction te age jabole paribo. Tai assure kuri se ki tai nijor time aru knowledge pura district welfare karone dedicate kuribo.
Short speeches President, Mokokchung District GB Association; Chairman Khensa Village Council (district laga sob village laga side para); Ao Senden laga representative (Ao Civil Society laga side para); Chairman MMC; PA to DC; Principal ITI (DPDB Mokokchung laga side para); ADC Mangkolemba (Admin Officers laga side para); aru Sr. SP Mokokchung para diise. Farewell tune Yimkum para perform kurise. Programme ADC Headquarters, Mokokchung para chair kuise.
Add Comment