Monduk hoikina thaka Kartik Aaryan para Gwalior te ‘Chandu Chamion’ trailer launch hobole thaka tu cancel nukuribole faisla loisey

New Delhi, May 17 : Kartik Aaryan laga maternal(ama laga side fale para) uncle Manoj Chansoria aro tailaga aunty Anita tu May 13 te Mumbai te ekta hoarding taikhan laga opor te gira nimitey murijaisey. Ekta dust-storm(dust tufaan) aha para Mumbai laga Ghatkoper te ekta hoarding ke giraidisey kuntu te 16 manu laga jaan jaisey. Kartik laga ama side fale laga uncle aro aunty bi etu ghotna te murijaisey. Kartik para taikhan duijun laga funeral attend kurisey. Etu majotey, enaka khobor chuli thakisey ki Kartik laga film ‘Chandu Champion’  laga Gwalior te hobole thaka trailer launch tu cancel hoijabo. Hoilebi ekta source para koisey, “Kartik tu tailaga uncle aro aunty laga accident te death hoija ke loikina mondukh kuri asey. Hoilebi tai tu tailaga home town Gwalior te ‘Chandu Champion’ laga trailer launch hobole thaka tu cancel kuribole mana kuridisey.” Etu film laga production house logotey close thaka ekta source para agey barikina Kartik para etu trailer launch cancel nokora laga asol karon janaisey. Etu source para koisey, “Kartik ke enaka lagisey ki  Chandu Champion ke banabole nimitey pura team para 3 years mehnat kora tu tailaga personal dukh nimitey affect hobole nalagey etu nimitey tai para etu film laga makers khan ke plan laga hisap te agey baribole koisey.” ‘Chandu Champion’ film para Kartik laga first look te tailaga role nimitey tai para mehnat kora aro gao bodli kora tu dikhai asey. Aro sob manu ke asurit kurikina rahidisey. Etu film ke Kabir Khan para direct kurisey. Kartik tu etya ‘Bhool Bhulaiyaa 3’ laga shooting kuri asey.