Nagaland Sorkar kan Measles Rubella (MR) Vaccination Campaign toh October moina darek 3, 2018 te manabole ase. Etu ke 4.72 lakh bacha kan 9 moina aro 15 sal hua kan ke etu MR Vaccines dawai khelabole ase. Aro etu MR Campaign mana toh measles bemar hataidebole aro Rubella aro Congenital Rubella Syndrome (CRS) kana mi kan desh te sob rokhaidebole kuribole hisabte hi mana laga ase. Etu karne etu dawai khelabole thaka aro khabole thaka kan sob logot etu dawai khabole aro khelabole lagaa laga ase koi kena, khobor pora janaise.
Etu nejete thaka kan toh kele ami kan etu MR Vaccines laga ki-ki janibole lagi etu kan janaide ase :
Etu MR Vaccine dawai toh ekta safe aro effective vaccine dawai ase. Aro etu dawai toh duniya sob desh jaka te 40 sal porabi besi hisabte julabole bara laga ase.
Etu Vaccine Reactions kan kobi sore arm anahuile mild bemar kan toh besi bhak ene chotu-motu aro ekbar nemite lagahi ase. Aro sob Sorkar Health facilities kan etu Adverse Events Following Immunization sabole karne bhal te shekaidiya aro janibole diya kan hi ase.
Etu bemar hua kan ke sabha-sabhi thakibole kura (Good Hydiene and sanitation), sabha pani aro bhal bhat (nutrition) kan pora eku bhal kuridebole aro rokhaidebole nabara laga ase.
Etu MR Vaccine dawai pora ami kan laga Immune System te bhal pora kam kuribole de. Etubi husa kebi ami kan Immune System kam kuribole diya nesena. Aro etu Dawai pora ami kan laga Immune System kam kuribole diya pora eku bemar nakure koise.
Etu dawai kan kuoba ke Thiomersal koi kena ekta Organic Mercury thaka Compound ase. Etubi bhal nemite kam julabole hisabte thala laga. Aro etu Compound toh bhal ekta aro besi bhak dawai te thali kena julabole bara laga ase. Aro etu dawai kan ke etu Thiomersal thala toh besi thali lebi nahuile komti thali lebi ami kan laga kao ke eku biya kuridebole laga nahui koise.
Etu MR Vaccine dawai aji-kali Campaign mana ke banai kena ana kan toh sob India desh majutte hi bana laga ase. Aro etu banabole kura toh Central Drugs Standard Control Organisation (India) pora ulabole kurikena kura laga (licensed) ase. Aro etu MR Vaccine toh duniya sob te ulai kena thaka kan toh besi bhak India desh porahi ula laga ase koise.
Etu Campaign te MR Vaccine dawai maribole nemite biji (Syringe and needles) kan jula toh sob sabha-sabha kurikena ki-ki latera-batera buuk kan (Sterile packaging) thaka laga nahui. Aro etu biji kan toh khali 1 bar hi julabole (auto-disable) bana laga aro bara laga ase koise. Matlab 1 bar biji jula toh aro 2 bar julabole nabaribo.
Add Comment