India, 24 May 2025: India laga famous mithai Mysore Pak banai thaka royal cook Kakasura Madappa laga great-grandson, S. Nataraj, recently mithai laka naam change kurile strongly oppose kurishe. Tai koishe, “Mysore Pak maathi bhi—alak naam dibole napare.”
Tai bujai dishe ki jiman bhi tradition aru monument ase, sabole thik naam thake, aru etu mithai laga naam bhi change nah kuribo lage. “‘Pak’ word Kannada language para aase, aru ‘Paaka’ mane sugar syrup ase,” tai koishe. Etu mithai Mysore te banai thakishe, kintu tai naam Mysore Pak hoishe.
Etu issue shuru hoishe kitia Jaipur, Rajasthan laga tinta popular sweet shop—Tyohaar Sweets, Bombay Misthan Bhandar, aru Agarwal Caterers—mithai laga naam para “Pak” hatai dishe. Tai “Pak” replace kuri kina “Shree” use kurishe, patriotism dekha bole. Jiman Aam Pak hoishe Aam Shree, Gond Pak hoishe Gond Shree, aru Mysore Pak ke bhi Mysore Shree banai dishe.
Etu naam change laga trend shuru hoishe Pahalgam te terrorist attack aru Indian Army laga Operation Sindoor pichete, juntu Pakistan aru Pakistan-occupied Kashmir te terror camp upor operation thakishe. Konba manu “Pak” word Pakistan logot link kurishe,etu karne tai avoid kuribole bisare.
Tyohaar Sweets laga Anjali Jain PTI ke koishe, “Ami desh ke bhal pabo dikha bole aji naam change kurishe. Attack pichete, ami nijor feeling etu dekhaise.”
Kintu language expert khan bujai dishe ki “Pak” word Persian para aai thaka word ase, aru etu mane “sweet” aru “pure.” Hindi aru Kannada te “Pak” hoile sugar syrup te banai thaka khana ke bujai—tai original naam thik ase.
Add Comment