Headlines

Naga Chef 6th Season laga Contestants kan

November 22, 2018

KOHIMA, NOVEMBER 21 : November 21 te Naga Chef Season-6 laga Round 3 luise. Etu time te 6 jun Contestant kan Round 4 “My Naga Thali” nemite junidiya huise. Aro etu Round 4 toh November 22, Macha Ki, Kohima te lobole ase koise. Etu 6 jun Contestan kan laga ki-ki khobor kan toh (Profile) nejete janaide ase :

  1. Dennis Suohu : Etu Dennis Suohou toh Kohima te thaka manu ase. Aro tai etu Naga Chef koi kena mata janibaa toh Social Media pora jani baa laga ase. Etu porahi tai etu Naga Chef laga 6th Edition te hisha kuribole kurikena ahese koise. Tai laga jeevan te bi etu Cooking toh tai laga babuna hi thaka laga ase. Aro etu nemite tai ke etu Naga Chef te hisha kuribole karne opai anediya karne etu Naga Chef ula Synergy Group Enterprise aro Tourism Department (GON) ke besi khushi baa janaise koise.
  2. Tokali Jakhalu : Bhaat baaka aro gaana kura toh (Cooking and Singing) toh tai laga babuna (passion) hi thaka laga ase. Aro tai laga khor manu majutte tai toh 2 ta wala dangor bacha (2nd eldest) ase. Aro tai tai laga amma logot bhaat baaka ke hutai motub kurikena thaki. Etu pora tai ke etu bhaat baaka ke mon te chuhi diya huise. Eneka huikena hi tai edia toh Naga Chef Season-6 te hisha kuri ase. Aro etu hisha kura toh tai nemite ekdam bhal laga kam ase koise. Aro tai bi etu pora Café aro Restaurant toh kholibole babuna kuri ase koise.
  3. Lipok Longkumer : Etu Lipok Longkumer toh bhaat kan baaka toh bacha time pora hi baakai kena aha laga ase. Aro tai bi bhaat kan baaka toh kissim-kissim baakabole toh tai laga babunahi thakise koise. Tai bi Naga Idol Season 2 te hisha kurikena Top 6 Finalist naam te aha laga ase. Etu oporte tai bi bura ke besi khushi bai aro Country Gaana kura ke tai bhal (Professional) ekta ase koise.
  4. Disuang Sago Zeliang : Etu Disuang Sago Zeliang toh Hotel Grand Tizu te Executive Chef nemite bohi ase (is working). Bacha time porahi tai bhaat baaka te besi khushi bai kena thaka laga ase. Aro tai bi Italian Restaurant kobi Belle Ciao te aro Animal King Hotel, Chennai laga te Assistant Chef nemite kam kurikena thaka laga ase. Asulte tai toh Chinese Cuisine nemite sheki kena besi bhal wala ekta huikena aha laga ase. Huilebi tai bi Naga Dishes nemite khushi bai kena thaka manu ase koise.
  5. Mhomo Ngullie : Mhomo Ngullie toh ekta Adaventurous aro Fun nemite khushi bai kena thaka moda ase. Etu oporte tai bi berabole aro ki-ki kobi notun jaka, kissim-kissim bhaat kan baakabole aro cultures kan janibole mon thaka manu ase koise. Tai bi etu Naga Chef hisha kurikena khotum hua bejete Food Eating Challenge te hisha kuribole ase koise.
  6. Vikhuli Achumi : Vikhuli Achumi toh bhal bacha 3 ta laga amma ase. Aro tai bhaat kan toh khor manu kan aro aha manu kan nemite bhal te baakabole karne khushi bai kena thaka manu ase. Aro tai ke etu pora khor manu kan aro aha manu kan pora bhaat baaka ke ahkete bhal te jabole kuribi koi kena bhal kotha janaide thaka laga ase. Huilebi tai etu nesena Naga Chef te eneka Contestant nemite ahebole bisas aro babuna hi thaka nai. Huilebi tai Contestant nemite ahe kena ki-ki besi bhal te jani ase koise.