Naga society te politics laga khatra

Aji kal laga time te, Naga society te politics ekta unity pona laga nahoi kena, ulta ekta division kura laga  source hoi jai se. Pura ekta time te politics to community build kuribo aru development anibo karone use kura thaka laga ase. Kintu aji politics logot corrupt practice, tribalism, manipulation aru power struggle jori jai se. Politics laga role governance te important ase, kintu Nagaland te politics juntu style te use kuri jai ase, etu para society laga fabric ke disturb kuri ase. Ekta dangor danger hoise tribalism. State te politics ideology nai, merit nai, aru mostly tribe laga loyalties aru mila mili logot based ase. Candidate aru political party khan nijor tribe ke satisfy kuribo karone kosis kure, baki tribe ke ignore kure. Etu karone state level te unity nai, aru ekjon ekjon ke suspicion para dekhe. Election nimite, manu khan divide hoi jai ase. Etu division thakile, Naga identity weak hoi jaibo, aru united future banabole impossible hobo. Dusra danger ase, corruption aru money power. Campaign juntu public service, vision aru honesty logot jiti bola lage, etu aji kali poisa aru alcohol diya te depend kuri ase. Vote buy kura laga nium loise, manu laga real choice to hissab nai. Juntu candidate power te uthi, tai public ke serve nakure kena, ulta tai support diya group ke satisfy kure. Public fund misuse hoi jai ase, education, health, road sob ke neglect kuri jai ase. Itu politics to development laga barrier hoi jaise. Youth khan juntu society laga future hope ase, tai khan bhi politics te dhuki jaise, kintu galti reason karone. Young manu khan ke lure kuri ase money, easy fame aru power para. Tai leadership value na sekhi, short-cut route te pisari kena jai ase. Itu karone future generation bhi corrupt hobo laga danger ase. Aru real change anibole chance kom hoi jabo. Youth ke honest leader banai bole training dibo lage, values, responsibility aru sacrifice laga concept teach kuri bole etya bishi important ase. Politics to fear aru violence laga ground hoijaise. Election time te threat, physical violence, aru intimidation use kuri jai ase. Opposition voice suppress kuri jai ase. Public khan bhoi logot thake, aru nijor laga opinion kobo na pare, protest na pare. Democracy thik par cholibo na pare, jodi public free speech nathake aru nijor mon teh bhabana express kuribo napare. Religion bhi misuse kura jaise. Religion juntu peace aru morality laga source hobo lage, itu bhi vote khan kichi bole karone use kuri jai ase. Itu karone religious institution laga respect kom hoi jai ase, aru believer khan ke confuse kuri ase. Etya time ase change anibole. Society te political reform bishi important ase, honesty, integrity aru justice logot. Leaders ke accountable rakhibo lage. Civil society, student unions, church, elders khan milikena public ke educate kuribo lage, vote laga power bujhibo lage. Poisa aru tribe base te vote na dibo lage, merit laga opor dibo lage. Politics ke reclaim kuribo time aahi jaise. Politics ekta serve kuribo laga means hobo lage, divide kuribo nahoi. Danger ase, hoilebi hope bhi ase. Awareness aru responsibility logot, Naga society ekta better, united future build kuribo paribo.