CHENNAI, SEPTEMBER 4 : Nagaland Governor Shri PB Acharya toh “Naga Reju” te jaise. Ekta Naga Restaurant, Chennai te thaka ke. Etubi Loyola College osor te thaka ke. Aro etu Restaurant toh Shri Maong Jamir, Nagaland laga pora khola Restaurant ase. Aro etu Shri Maong Jamir bi etu Chennai te PhD buri ase koise.
Etu Nagaland Governor etu Restaurant te jua toh August moina darek 25, 2018 te jua laga ase. Etu time te Governor Acharya aro tai laga maiki Smti Kavita Acharya 2 jun pora Shri Maong aro tai laga maiki ke khushi baa janaise. Kele tai 2 jun eman lekha-bura manu huikena bi etu Restaurant kholi kena ekta Entrepreneurship mani kena mon eman shant pora (Passion) thakibole bara karne. Aro tai 2 jun porabo tai 2 jun ke etu nesena Entrepreneurs kam julabole kura pora tusera manu kan kebi mon chuhi thakibo koi kena bhal kotha janaide thakise koise.
Governor porabi tai 2 jun nesena lekha-bura Jawan kan bi Entrepreneurship kam julabole kuribo lagi koi kena janaise. Aro etu nesena kam te kurikena manu kan nemite bhal te kam kuribole kuribi aro manu kan ke kam debole kuribi koi kena janaide thakise koise.
Governor porabi “Naga Reju” kan Naga laga ki-ki khabole chis kan banai kena thaka aro banabole kura karne khushi aro salam diya janaise. Aro etu oporte tai bi etu Restaurant laga malik ke bhal-bhal Handicrafts aro Handlooms kan Nagaland state laga toh ane kena etu Restaurant te rakhibole janaise. Kele etu porahi ami kan Naga manu lag Culture aro Tradition tusera manu kan pora janibo koi kena.
Nagaland Governor porabi etu Restaurant te manu aha kan ke (customers) ki-ki khelabole time te Naga Traditional Wooden Bowls, Bamboo Mugs, Wooden Serving Spoons, Wooden Plates aro tusera kan pora khelabole kuribi koi kena janaise. Kele etu porahi Naga manu laga adat aro styles kan toh aha manu kan khushi babo (attracts) aro Nagaland state laga saman kan (Products) bi ahkete ahejua hobo aro janijua hobo koi kena.
Etu Restaurant te Governor Acharya bi tai laga maiki logot eke pora Naga bhat kan khaise. Etubi etu restaurant laga malik aro kam kura manu kan logot eke pora. Aro etu Naga manu laga culture aro traditions kan tusera manu kan kebi janaidebole kura karne tai salam diya aro khushi baa janaide thakise koise.
Add Comment