Nagaland kan pani chamala nemite Rs. 800 crore laga huise

KOHIMA, SEPTEMBER 2 : Jua jua din phale North East Indian state kobi Nagaland toh Kerala State te pani chamala hua nemite poisa uthai kena aro chama kurikena Rs. 1 crore dedese. Huilebi edia toh Nagaland state te bi Kerala kan nesena pani chamala hui ase. Kele etu pani chamala Nagaland te bi hua pora 12 jun manu muraidese aro 3000 khor manu kan neju khor nathaka huise koi kena.Etu nemite khobor te Nagaland Sorkar kan pora ami kan State te bi eti nahua mousom pora pani besi kerikena chamala kuridiya ke Centre logot saidebole kotha janaise. Etu ke Rs. 800 crore nesena lagaa huise koi kena janaise. Kele ami kan state te etu pani chamala pora manu kan 12 jun muraidese aro 5000 khor kan biya kuridese. Aro 600 jun manu kan toh Relief Camp te ase koi kena.Etu karne Prime Minister Narendra Modi pora Saturday din Nagaland Chief Minister Neiphiu Rio ke kotha kurise. Aro tai husa kebi ki motub lagi ase etu kan sob motub kuridebo koi kena janaide thakise koise.Khobor hisabte Nagaland Sorkar pora 2.6 lakh manu kan kobi ami kan state laga manu kan pura ke hisab kurile 13 percent nesena kan toh 532 bosti jaka te etu pani chamala huikena diktar hui ase. Aro 5000 acres, kheti kura jaka aro mati kan bi pura-puri diktar kuride kena ase koi kena janaise. Etu karne Johny Ruangmei, Officeron Special Duty, Nagaland State Disaster Management Authority pora bi ami kan state laga manu kan husa kebi chulti pora jawal aro tusera khoa-lua chis kan ekdam lagi ase koi kena janaise. Aro Engineering Agencies kanbi ami kan state te ahe kena rasta kan biya huikena thaka bi sob saidele bhal koi kena janaide thakise. Etubi bhal-bhal Technology (Better Technology) kan pora. Tai bi chuti etu rasta chamala kebi saidebole kurise koile ami kan state manu kan besi khushi babo koi kena janaise.