Nagaland Laga Chief Minister – Neiphiu Rio Para Itu 72nd NEC Plenary Tey Attend Kurishey, Kuntu Toh Hoiley 21st December Tey Loishey, Agartala Tey

December 22, 2024, 06:21 PM: Itu NEC Governing Council laga 72^nd Plenary loishey, 21^st December 2024 tey, Nagaland laga Chief Minister – Neiphiu Rio para address kuri kena koishey, ki, NEC toh hoiley ekta statutory Regional Planning body hisap function kuri kena ahishey, 1971 tey para. Itu opportunity loi kena, Itu Chief Minister para koishey, tai bhal toh record rakhi asey, itu NEC para pioneer kuri kena kaam kuria ke, itu region laga development nimitey. Chief Minister para koishey ki, tai khan toh hoiley itya 50 saal nishina hoboley nishina asey, kitya para NEC toh hoiley set up kurishey, hoilebi itu region tey toh hoiley itya bhi bishi bhorta developmental deficit thaki kena asey, itu developed State khan ke compare kuri sailey, itu mainland laga. Itu North Eastern Council kuntu toh hoiley ekta special purpose logotey set up kuri kena asey, special need khan karney, tatey bishi resources khan lagi asey dispose kuriboley karney. Eneka thakilebi, bishi saal para, itu NEC laga functional autonomy toh hoiley Parliament para intend kurishey, kuntu toh hoiley significant para dilute kuridishey aru NEC laga role toh hoiley insignificant hoi jai asey. Chief Minister para aru koishey ki, itu poila laga Plenary khan laga homoi tey, tai para toh hoiley chinta thaka laga janaishey, itu NEC laga khotom hoi thaka role laga aru fund allocation enhance kuriboley lagi thaka nimitey chinta janaishey, NEC nimitey. Itu nimitey, tai para itu NEC laga Chairman ke request kurishey, aru bhi budget allocation provide kuriboley consider kuriboley karney, NEC nimitey aru tai para power khan laga delegation baraboley laga koishey, project khan sanction kuriboley karney, eneka hoiley hey itu regional aspiration khan, itu State khan laga, itu Council para full kuriboley lagi thaka laga.