Nagaland National Games te

Uttarakhand te huwa 38^th National Games te Nagaland laga performance para etu state laga sports laga halat te musibat aha tu dikhai asey. Etu Games te Nagaland para 6ta khel- archery, athletics, boxing, taekwondo aro wrestling te khali 10ta participants hey thaksiey aro duita bronze medal jitisey. Etu para Nagalnd ke second-last rank te rakhidisey, Sikkim para ekta rank agey. Sikkim para bi duita bronze medal paisey hoilebi taikhan laga team te 33 participants thakisey. 

Dusra North-East state khan ke compare kurisey koiley Nagaland nichey girija tu safa-safi dikhi asey. Manipur te jhamila chulithaka laga bawajut etu Games te 432 players pathaisey aro 55 medal paikina desh laga 11^th position te ahisey. Assam para 337 participants thakisey aro 34 medal paisey. Arunachal Pradesh para 43 players thakisey aro 13 medals jitisey. Baki state- Meghalaya para 59 players, Sikkim para 33 players aro Tripura para 22 players thakisey. Etu sob state logotey Nagaland para bisi participants thakisey. 

Etu safa-safi dikha difference para ekta dangor sawal khara korai asey: Nagaland laga sports khilibole para laga kabiliyat tu dui saal bhitor tee man biya hoijaisey naki, na etu toh ekta repeat hoithakibole laga pattern asey naki?

National Games te Nagaland laga poila laga performance khan ke wapas saisey koiley ekta chinta koraidiya laga pattern dikhai. Nagaland tu sobsey first 2007 te huwa 33^rd National Games para participate kora suru hoisey, kuntu toh Guwahati te hoisiley. Etu homoitey Nagaland para 11 medals jitisiley, kuntu majotey ekta gold medal thaksiey. Hoilebi etu jeet tu olop homoi karney hey thakisey. Jharkhand laga Ranchi te huwa 34^th National Games te Nagaland para khali 3ta bronze medal hey jitisiley. Etu picheyte next saal para toh performance aro biya-biya hoikina ja dikhibole paisey. Enaka kurikina 2015 aro 2022 te huwa National Games te ekta medal bi panai. 

2023 te Goa te huwa National Games te hope tu wapas zinda hoisey jitya Nagaland para 8ta medal jitisey. Utu saal te Nagaland para Pencak Silata martial art te ekta Gold medal, Sepak Takraw game aro Boxing  te duita Silver paisiley. Hoilebi, Nagaland tu 43 sports majotey khali 7ta sports te hey qualify hobole parisey. Aro 46 players pathaisey. 

Etya 2025 te participants laga number tu bisi komti hoikina khali 10jun hey thakisey. January 28 para February 14 taak chola 38^th National Games te 35 sports laga competition thakisey.

Hoi, Uttarakhan te huwa etu bar laga National Games te Pencak Silat aro Sepak Takraw games nathaka nimitey Nagaland para participants laga number komti hoisey parey, hoilebi asli problem tu Nagaland te ekta majboot sports infrastructure aro policy nathaka laga asey. Etu 2018 para lagu huwa, National Sports Policy, kuntu laga bari tee man kotha chulithakisey etu toh gayap hoikina asey.

Ekta clear plan nathakikina etu strategy tu khali dangor events host kuribole nimitey hey thaka nisna asey, bhal support system aro tagra policies nathakikina. Enaka adha-khichara planning kora laga result tu khel laga tayari bhal para kuribole napara aro sports te bar-bar biya perform kurithaka asey. 

2027 te Meghalaya te 39^th National Games hobole thaka laga countdown suru hoithaka homoitey, Nagaland tu etu te bhal perform kuribole nimitey etya para tayari suru kuridibo lagey. Government para Sports policy bana aro etu ke imandari aro urgent para implement kuribo lagey. Meghalaya 2027 laga journey tu etya suru hobo lagey.