Headlines

Nagaland Students pora ami kan state ke khushi banaidese

October 10, 2018

DIMAPUR, OCTOBER 10 : Nagaland School laga Students kan India Internation Science Festival, Lucknow te October 5 pora 8 dak thaka time te hisha kurikena thakise. Etu time te etu din laga Competition te etu Nagaland School Students kan ahke Prize 1 ta, 2nd Prize toh 2 ta, 3rd Prize toh 2 ta aro consolation Prize toh 1 ta koi kena North East Students Conclave te chetibole aro lobole barise. Etu pora ami kan State ke besi khushi banaide ase koi kena, khobor te pora janaise.

Etu din toh 4 din hisabte manabole kurikena manaise. Aro etu Asia laga ekta sobse lamba hisabte mana laga Science Festival din ase. Aro etu cheta kan sob melekena 6 ta Prizes hua pora edia toh Nagaland state bi Sister NE States majutte etu NES Conclave te ahejaa huise koi kena janaise.

Etu NES Conclave te mana din laga theme toh “Developmental Prospects of North East” koi kena ase. Aroe tu theme hisabte hi North Eastern State laga students kan pora 37 ta Presentations kan manai kena thakise koise.

Etu Presentation te Prize lua kan toh Shoniu Shiu, Baptist High Kohima laga class 11 student pora 1st position; Lemchila Sangtam, Govt. Higher Secondary School, Tuensang laga class 11 student aro Kikasangla, Holy Cross Higher Secondary School Dimapur laga class 12 student 2 jun pora toh 2nd prizes luise;  Metsongmalem M Chang, GHSS Tuensang laga class 11 student aro Yaikomba Thingujam, Holy Cross HSS Dimapur laga class 10 student pora toh 3rd prizes aro Anushka Bhattacharjee, Pranab Vidayapit HSS, Dimapur laga class 11 student pora toh  consolation prize luise koise.

Etu din laga Presentation te kotha kura manu nemite thaka (Jury) bhal Scientists kan porabi etu Nagaland state students kan laga bhal (Talents) sai kena besi khushi baise. Aro etu Scientists kan porabi tai kan logot etu neju jaka te bhal te Scientific Research kan kurikena aro manai kena thakibole kuribi. Aro etu pora ami kan Northeast Region aro Desh ke ahkete anebole kuribi koi kena janaide thakise. Aro tai kan Scientists porabi etu Nagalans students kan ke alak-alak Research Oriented Programmes nemite study kuribole karne motub kuribole kuribo koi kena janaise koise.

Etu NE Students Conclave toh Union Cabinet Minsiter Dr. Harsh Vardhan pora October 7 te suru kuridiya laga ase. Aroe tu din khotum hua din te toh Dr. Renu Swarup, Secretary, Department of Bio Technology, Government of India pora dese koise.

Etu Nagaland team kan toh 25 students aro 5 teachers kan Govt. HSS, Dimapur, Kohima, Mokokchung, Ungma, Phek, Mon, Tuensang, Holy Cross HSS Dimapur , Pranab Vidyabith HSS Dimapur, Baptist High Kohima,  Mezhur HSS Kohima aro Queen Marry HSS Mokokchong pora hisha kurikena thakise. Aro tai kan sob logot Nellayappan, Assistant Director pora ahkete luijai kena luijaise (Assisted) koise.

Menukhol John, Principal Secretary, School Education; Wonthungo Tsopoe, Director, School Education aro Asano Sekhose, Chairman, NBSE laga kan pora etu Nagaland Students kan etu Competition te cheta aro hisha kurikena thaka kan sob ke salam diya aro besi khushi baa janaise. Kele tai kan pora ami kan state ke besi khushi kuridese koi kena. Aro etu Students kan ke motub kura aro ahkete luijabole kura Teachers, School Authorities aro bapa-amma kan ke bi besi khushi baa janaise koise.