Nagaland Super League

January 28 para suru hobole thaka Nagaland Super League (NSL) tu Nagaland te football nimitey ekta dangor kadam utha tu dikhaiasey. Etu league tu dui-moina chulibole asey. Aro etu te 7ta football club compete kuribole asey. Match tu Chumoukedima aro Kohima te thaka duita dangor stadium te hobole asey. Hoi, etu league laga potential ke inkar kuribole naparey  hoilebi etu lamba homoi tak  chulibo na nai etu tu taikhan para etu khel logotey jurikina thaka musibat khan laga kinaka samna korey aro football nimitey josh thaka tu kinaka barabo paribo etu opor te depend kuribo. Football tu poila para Nagaland laga culture te thakikina ahiasey. Chutu community tournaments para loikina dangor event taak jaiseki Dr. T. Ao Trophy aro NSF Martyrs Cup, football game para manu khan ke bisi baar eksath anisey.  Hoilebi, Nagaland laga football achievement tu bisibhak rajya bhitor te hey thakijaisey. Nagaland laga bisi komti players hey national level te gusibole parisey, yatey etu sports eman  popular huwa laga bawajut bi. Aro etu mamla ke Nagaland Super League (NSL) para ekta bhal para banaikina thaka aro competitive environment dikina change kuridibo parey. Regular match kora, professional standard rakha aro bisi audience khan ke expose kora para local players khan ke agey baribole aro Nagaland laga bahar te opportunities pabole modod kuribo paribo. Hoilebi, etu change tu titya hey anibo paribo judi etu league ke ekta long-term vision logotey manage korey aro khali competition te hey jor diya nohoikina players, coach aro stadium khan laga development te bi dhyan diye. NSL para Nagaland te football ke hosa te bi benefit kuribole nimitey , etu logotey ekdam suruwat level laga development nimitey investment bi thakibo lagey. Hosla baraidiya laga kotha tu, Nagaland te football laga private academy khan olai asey. Aro ama-baba khan majotey baccha khan ke chutu umar para sports te introduce kuribole laga importance janiya tu bariasey. Etu development khan ke football league, local academy aro school/college khan majotey milikina kaam kurikina support kuribo lagey taaki talent laga ekta ekta majboot talent pipeline banabo paribo. Coaching tu aro ekta jaruri area asey. Skilled aro well-trained coach nathakisey koiley, sobsey bhal player bi taikhan laga kabiliyat dikhabole dikdar pabo parey. Coach khan ke train kurikina certify kuribole laga program aro etu logotey workshop aro football nimitey mashoor thaka jaga logotey coach khan exchange kora para etu game laga  standard ke baraidibole modod kuribo. Infrastructure bi ekta dangor badha hoikina asey. Hoi NSL match tu duita mashoor stadium te hobole asey, hoilebi Nagaland laga alag alag jag ate bhal training facilities aro ground khan nathaka para progress te badha aniasey. Etu problem ke dur kuribole nimitey government, private sector aro community organization khan para milikina kaam kuribo lagibo. Football league laga success tu khali players aro prganizers khan ekla nohoikina fans opor te bi depend korey. Stadium aro online te bi manu khan  support dikha para players khan laga hosla barabo aro sponsor khan ke bi attract kuribo. Ekey homoitey, communities khan para football ke ekta career option nisna sabo lagey. Bisi homoi para, sports ke ekta professional khel nohoikina eney interest nohoilebi time-pass nimitey khela laga asey koikina bhabna kurikina ahiasey. NSL nisna initiative para etu soch ke bodli kuribo paribo judi taikhan logotey sports laga field te success huwa laga kahani khan dikhabo parisey aro youth khan logotey lamba homoi tak kaam kuri thakisey koiley.