Nagaland te business laga kotha koa time te olop alag type laga bhabna thake. Dusra jagah, specially India aru Northeast state khan te, manu khan business aru entrepreneurship ke bha rasta para dikhi, aru encourage kore. Kintu Naga society te, business to ekta taboo ase, bhal kaam laga nisena nasai. Etu kotha bujhe bole important ase, karon etu thinking khan jodi change na hoile, future te economic growth pabole dikdar hobo.
Naga manu laga traditional lifestyle to farming, jhum kheti, aru self-sufficient homoi te based thakise. Purana time te manu barter system use kori thakise, aru sob kotha community upor depend kori thakise. Etu culture to unity aru cooperation to promote kore, kintu etu karone personal enterprise, competition, aru individual success laga concept thaka nai. Business khulile kena poisa kama, etu ke biya kaam nisena dekha jai. Profit bisari kora manu khan ke community te bishi bhal nazor te na sai.
Dusra dangor reason hoise — government job laga worship. Nagaland te maximum youth khan laga target hoise ekta government job paabole. Public service exam, peon, police, teacher, clerk — etu sob laga competition ase, karon manu bisare ekta secure aru monthly salary thaka job. Business tu unstable ase bhabi jai, risk ase, aru prestige nai. Etu karone businessman ke etu para kom respect diya jai, government servant logot compare kurile. Etu mindset tu business ke develop koribo naparibo.
Family level te bhi pressure bishi ase. Jodi kunuba business start koribo bisare, parents khan koi thake: “Fail hoi jabo”, “Loan uthile ki koribo?”, “Manu ki kobo?” Etu fear aru social shame laga bhoy pora, youth bhi nijor idea implement koribo napare. Capital utha bhi duk ase, investor khan nai, infrastructure te problem ase, aru government laga policy bhi clear nai. Support system na thaka karone, business try kora manu ekla feel kore thake.
Culture te bhi ekta problem ase. Service-oriented mindset to olop kom ase. Naga manu pride te thake — manu ke serve kora, public ke approach kora — enika kaam ke low level nisena dekha jai. Kintu world te to etu business definition ase. Service provide kora, dusra manu laga problem solve kora, ekta idea pora society ke help kora — etu he business ase. Enika thinking develop kora bishi important ase.
Etia new generation te change dekhi jai ase. Dimapur, Kohima, Mokokchung te online business, cafes, food delivery, fashion page, event management — enika business khan grow kori ase. Young entrepreneur khan risk loi kena try kori ase. Etu young minds khan ke ami khan support dibo lage. Enika manu khan Naga society ke develop koribo pare.
Future te jabole, mindset change koribo lage. Business tu shameful nahoi. Business tu empowerment, progress, aru independence laga rasta ase. School te entrepreneurship education dibo lage. Church aru civil society bhi positive message dibo lage. Parents khan encouragement dibo lage.
Naga manu khan jodi nijor future ke stable aru strong banabo bisare, business ke respect kora important ase. Taboo nahoi kena, support dia important ase. Etu pora he ami khan self-reliant aru dignified society banabo paribo.
Add Comment