Annual Status of Education Report (ASER) 2024 para etu khulasa kurisey ki Nagaland te chokra khan school naja laga rate tu bisi asey. ASER tu pura desh te kora survey asey kuntu tu pratham para conduct korey. Etu survey tu Nagaland laga 11 district te 329 busti te conduct kurisey. Kotey 3-16 years majotey thaka 10,056 baccha laga educational(pora likha) status te khoj kurisey. Etu khoj kora te etu bi janibole paisey ki chukri student khan para chokra student ke khali number te hey haraidiya nohoikina bisi saal para final board exam laga result te bi haraikina ahiasey.
Research kora homoitey etu janisey ki chukri khan language skills(bhasa sikha) tu chokra khan para olop joldi sikhiloi. Language laga area te chukri khan laga dimag tu chokra khan laga mukabala te joldi mature hoijai. Aro etu tu taikhan para baat-chit kora te bi dikhibo parey. Hoi etu khan tu homoi logotey thik hoijai hoilebi etu nutun survey, kuntu te chokra khan school naja laga rate bisi thaka dikhai asey, etu tu ekta serious mamla asey aro etu te sabole jarurat asey. Kilemaney etu laga asar tu dangor aro lamba hobole asey.
Aji amikhan laga state tu unemployment(kaam napaikina thaka) laga problem logotey juji asey. Poralikha hoikina bi kaam napa laga situation para problem olai asey koiley poralikha nathaka youth laga number barithaka tu aro bi bisi problem laga kotha asey. Chokra khan pora-likha nathaka laga number bisi hoija tu basic education bi napaikina bisi jun school charidiya nimitey asey.
School charidiya baccha khan tu komti tankha pabo, khas kurikina judi taikhan ekta area te bi skill nathakisey koiley. School khan tu etya kitab laga knowledge(gyan) te bisi focus nokora hoisey. Skill development te bisi focus kuriasey. Etu nimitey, poralikha thakikina bi kaam napa manu khan aro poralikha thakikina bi skills nathaka manu khan para bisi tu school charidiya manu khan hey lamba homoi tak kaam napaikina thakibo parey. Taikhan nimitey society te bi eman kaam naolabo.
School khan te chokra khan laga drop-out(school charidiya) rate bisi hoija para college khan te gender imbalance(mota aro maiki laga number equal nathaka) hoijabo kotey dikhadikhi chokra student para bisi tu chukri student khan asey. Etu para kaam kora jaga, khas kurikina kuntu te mota khan laga jarurat bisi thakey etu khan te bi effect kuribo. Bisi dangor area khas kurikina education sector te gender imbalance huwa nimitey gender equality(mota-maiki ke somman treat kora) laga pura mamla tu ekta u-turn loi asey.
Etu situation para dikhaiasey ki student khan, khas kurikina mota student khan school charidiya laga rate komabole nimitey kiba kadam uthabo lagibo. Etu te teacher, student, school managing board aro ama-baba khan para bi milikina ektra effort dhalibo lagibo. Hoi high drop-out rate huwa laga ki reason asey etu sabo lagey. Hoilebi bisibhak tu etu nijor ke bujibole napara nimitey bi hoi aro taikhan ke motivation(hosla baraidibole) laga jarurat thakey. Etu nimitey taikhan ke mentoring programme, vocational training aro taikhan laga hisap te sikhibole laga option dibole jaruri hoijai.
Judi chokra khan school naja laga rate bisi huwa te eku kadam na-uthaisey koilebi etu para ahibole homoitey amikhan laga society laga growth aro development te bisi dangor asar kuribole asey.
Add Comment