Nagaland te civic duty laga komi

Nagaland ekta bhal jagah ase – nature, culture aru identity pura rich thaka ekta state. Government bhi last bisi years te development karone bishi kaam kuri ase. Road, bijuli, school, scholarship, health scheme, aru sob benefit public ke di ase. Kintu ajikali ekta problem dangor hoi jai ase – manu khan jun benefit pai ase, taikhan etu ke respect na kure, aru beshi demand kuri thake. Government te problem to ase – corruption, delay, misuse – etu sob manu dekhi ase. Kintu etu sath-sath ekta reality bhi ase: public khan etu sob diya thaka facility ke properly use na kure. Government para banai diya road te kachara phailai thake, school aru community hall to misuse hoi thake, aru solar light, pump, pipeline khan bisi thaan ke damage kuri thake – karon kun bi care na kure. Aru etu pichhe bhi, demand to thaki jai ase. Manu khan beshi scheme, beshi grant, beshi job, beshi building maang thake – kintu jun already thaka ase, etu ke use aru maintain na kure. Etu ekta attitude hoise juntu Nagaland laga development ke slow banai ase. Entitlement ase, kintu responsibility nai. Public ke demand kuribo right ase, kintu ekta balance lage – juntu pai ase, etu ke respect, aru care kuribo lage. Government diya sob to “government property” nohoi – etu public property ase. Etu sob manuh laga property, aru etu ke sob manuh milai kene protect kuribo lage. Nagaland te bisi thaan te ekta common scene – waiting shed break kura, dustbin use na kura, tap khuli rakhidia, solar streetlight to damage kuridia. Etu sob example ase – ki ami khan public thaka benefit ke value na di. Tai khan repair kuribo nimite poisa to ekta notun jagah te use kuribole paribo thakise. Youth khan etu behavior dekhi thaki ase. Hoilebi taikhan bhi change na hoi, same kaam repeat hobo. Civic sense, public property respect, aru community care – etu sob aste nathaka hoi jai ase. Etu dangerous ase future nimite. Development to ekta two-way process ase. Government provide kuri thakile, public khan protect aru properly use kuribo lage. Jodi ami khan pura depend kuri thaki jai, aru kun bi responsibility na loile– growth to na hobo. Government bhal kaam kurile bhi result na aahibo, jodi public serious nohoile. Nagaland ekta stage te aahi se juntu future change kuribo pare. Kintu mindset change lagibo. Moi khan sob bujhibo lage – ki sob time government ke blame kuri thakibole nahoi. Moi khan laga role bhi ase. Kuntu pai ase, etu ke properly use kura, aru next generation nimite protect kura – etu moi khan laga duty ase. Nagaland ke grow kuribo hoile, gratitude, respect aru community sense lage. “Government ki dibo?” demand na thaki kena, “Moi ki kuriase moi ke diya laga saman ke?” bhabi bole time aahi jai ase. Etu pichite hi, real development hobo.