Nagaland te education system to ekta bishi important foundation ase, especially youth generation khan karone. Kintu etya present system te ekta dangor problem ase, book knowledge aru real life skill majot ekta dangor gap ase. Aji kali laga student khan exam pass to kuribo pare, kintu jitya student graduate hoi, practical life te face kura problem handle kuribo nimite tai ready nahoi. Etu karone youth unemployment uthi ase aru bisi student frustrated feel kure ase.
Youth khan ke exam result te top kura to bhal ase, hoilebi tai job market te compete kuribo nimite skill bishi important ase. Skill, example; communication, leadership, teamwork, digital knowledge, computer usage, entrepreneurship etc. bisi important hoi jai ase. Aji kali laga duniya to bishi fast changing ase, aru youth khan ke etu changing world te adjust kuribo nimite prepare kuribo lage. Nagaland te youth khan bishi talented ase, kintu system to ekbar update nahoile etu potential to waste hoi jabo.
Education system ke practical direction te loijabole etya bishi important ase. Example hisap te, high school aru college level te practical training, vocational class, career guidance, aru project based learning introduce kuribo lage. Student khan ke real life situation ke face kuribo paria laga ability develop kuribole bishi lagi ase. Khali theory ekla purile, real problem solve kuribo na paribo.
Internship, field visit, entrepreneur workshop, start up challenge etc. introduce kurile student khan experience aru confidence gain kuribo pare. Government aru private sector mili kena etu field te ekta long term plan banai lobo lage. Government ITI (Industrial Training Institute) upgrade kuribole bishi important ase, modern tool, experienced trainer aru industry linkage provide kuribo lage.
Private institution khan bhi modern teaching method use kuribo lage. Teacher khan ke digital method, skill based class aru motivational approach para train kuribo lage. Student khan ke encourage kuribo lage jate tai nijor laga interest identify kurile, tai skill develop kuribo pare. Online course, freelancing training, content creation, digital marketing etc. introduce kurile youth khan ke earn kuribo nimite platform dibo pare.
Youth khan ke unemployment karone blame na kura bhal. Tai khan try kure, kintu system help na kurile tai discouraged hoi jabo. Community, NGO, church, student union, aru local leader khan ke youth empowerment nimite united hoi kena kotha kuribo lage. Free training camp, youth startup fund, guidance program start kurile young generation khan dangor benefit pabo.
State government ke bhi policy level te fast action lobo lage. Rural youth ke target kuribo nimite mobile skill van, community learning hub, subsidized course, aru job placement assistance introduce kuribo lage. Youth empowerment kurile state development bhi bishi age jabole paribo.
Conclusion te, education system ke textbook knowledge para practical skill te convert kuribole time ahi ase. Youth khan ke confident, skilled aru productive banai dile, Nagaland laga future safe aru progressive hobo. Empowered youth na thakile, state bhi grow kuribole naparibo. Etu karone, education system ke para tak jolti change kuribole etya bishi lagia laga time ase, khali pass mark karone nahoi, hoilebi life te success pabo karone.
Add Comment