Nagaland ekta beautiful state ase, juntu culture, tradition, aru community bond te rich ase. Kintu politics laga side te, ekta serious concern uthabole laga time ahi jaise. Aji kali laga political system te public trust komti hoise, corruption bishi hoi jaise, aru leadership te accountability nai. Etu karone political reform, mane change ani bole system, ekdom important hoise.
Nagaland te political instability to ekta chronic problem hoi jaise. MLA khan party change kuri thake, alliance break hoi thake, aru public laga vote ke respect nakure. Assembly te opposition nathake, juntu democracy te bisi dangerous ase. One party government to check and balance na thaka situation create kuri dibo. Public ke juntu decision affect kuri thake, tate vote laga power bhi komti hoi jaise.
Corruption aru mismanagement bhi major issue ase. Bisi development project te fund misuse hoi, work delay hoi, aru quality bhi low thake. Contractor khan political connection use kuri kena kaam loi thake, honest bidder ke side te rakhi jai. Etu karone public bishi frustrated hoise, especially youth khan. Political reform to etu system ke change kuri bole lage; transparency, monitoring, aru punishment for corruption laga system lagi ase.
Political parties te bhi reform ani bole lagi ase. Bishi party to ekjon leader ke follow kuri thake, ideology nai, principle nai. Party bitor te democracy nai. Grassroots level te youth, woman, educated members laga voice nai. Party decision to top leaders khan nimite thake. Reform mane hoise; party te bhi election hobo lage, local unit ke power dibo lage, aru active participation promote kuribo lage.
Election system te bhi serious reform laga anibo lage. Money power aru muscle power use kuri kena vote buy kura system khotom kuri bole lage. Clean Election Campaign, juntu church aru civil society start kurise, etu ekta bhal initiative ase. Kintu eneka campaign ke support dibo nimite, government, Election Commission, aru public milaikena kaam kuribo lage. Strict rule, monitoring, aru punishment system bhi thakibo lage.
Nagaland laga traditional customary institution bhi important ase. Morung system, village council, customary laws; sob valuable ase. Kintu modern democracy te match kuri thaka system develop kuri bole lage. Reform mane culture hatai dibo nahoi, kintu justice, equality, aru representation ke ensure kuri bole laga ekta balance banabo lage.
Aji laga generation educated hoise, aware hoise. Young people politics te interested ase, kintu clean system na thaka karone discourage hoi jai ase. Political reform to youth khan ke empower kuribo, woman ke leadership te anibo, aru educated leaders ke support kuribo nimite help kuribo.
Lastly, reform mane bhal government, inclusive development, aru peaceful society. Nagaland te political reform lagi ase; jate politics ekta service hobo, business nahoi kena. Leaders ke accountable banabo, public ke participate kuribo laga chance dibo. Etu kaam sob milaikena kuribo lage; public, media, civil society, church, student bodies sob milaikena.
Nagaland deserve kuri ase ekta honest, clean, aru responsive political system. Aji political reform suru nahoile, ahge generation bhi same problem face kuribo. Reform to urgent ase; khali future nimite nahoi, hoilebi present nimitebi.
Add Comment